Për herë të parë në Kosovë, është mbajtur takimi i pestë i FIBA Europe Youth Commission dhe FIBA Europe U14 Get-Together për mandatin katër vjeçar 2023–2027, nga Federata e Basketbollit të Kosovës.
Ngjarja synoi diskutimin e çështjeve strategjike për avancimin e programeve rinore, shkëmbimin e përvojave dhe forcimin e bashkëpunimit në nivel evropian, duke ofruar një mundësi për promovimin e basketbollit dhe integrimin e Kosovës në rrjetin europian të FIBA-s, – shkruan Katror.info.
Takimi bashkoi përfaqësuesit e Komisionit të Rinisë së FIBA Europës, së bashku me anëtarë nga vende të ndryshme të kontinentit.
Mundesh me e lexu edhe…
“Kur vjen në një vend siç është Kosova, ka shumë gjëra për të bërë. Për shembull, dy gjërat kryesore ishin takimi i Komisionit të Rinisë dhe Takimi i Under-14, i cili është një nga programet kryesore për ne, sepse për në sigurisht Eurobasketi për djem, vajza, seniorë janë shumë të rëndësishëm, por si FIBA Europe, si një ekip në Mynih, ne vendosim më shumë kohë dhe përpjekje tek të rinjtë, tek programi i rinisë, dhe Under-14 është aty ku fillon gjithçka” – tha presidenti i FIBA Evropës, Jorge Garbajosa.
“Është një ngjarje që, sigurisht, me theksin që ka tani tek e ardhmja dhe rritja e bazës së talenteve në Kosovë, ka një rëndësi të madhe, dhe fakti që sjell kaq shumë specialistë nga e gjithë Evropa do të sjellë përfitime për trajnerët vendas dhe për të gjithë komunitetin. Në përgjithësi, mendoj se ndikimi do të jetë fantastik” – u shpreh Radmila Turner, Përgjegjëse e Federatave Kombëtare në Evropë.
Në kuadër të kësaj ngjarjeje, u zhvilluan gjithashtu aktivitete të lidhura me turneun “U14 Get-Together”, duke theksuar rëndësinë e zhvillimit të basketbollit për të rinjtë në Evropë.
“Po shpresojmë që të gjitha këto aktivitete që po i ndërmarrim të mos i shërbejnë vetëm asaj që quhet diplomaci sportive, po edhe takimin që sot e përfundum që është i Komisionit më të rëndësishëm të FIBA Evropës – Komisioni për të Rinjtë edhe sjellja e njerëzve këtu në Kosovë, po edhe zhvillimi i këtyre punimeve këtu, besoj që tregojnë edhe dëshmojnë edhe njëhere se Federata e Basketbolit në Kosovë vazhdon të jetë e involvuar me tërë qenien e vet për ta zhvillu basketbollin”- tha Arben Fetahu, Kryetar i FBK.
“Partnerët tanë në zhvillim, përkrahësit kryesorë, janë Ministria e Kulturës, Rinisë dhe Sportit; TEB Bank është sponsor i përgjithshëm i ekipeve kombëtare që nga viti 2025; ndërsa FIBA është partner strategjik për zhvillim. Kemi bashkëpunim rajonal me Turqinë, Rumaninë, Bullgarinë dhe Maqedoninë e Veriut. Siç e dini, në kuadër të FIBA Europe Youth Development, që nga viti 2017 kemi bashkëpunuar për turne me djem dhe vajza” – tregon Elvira Dushku, Sekretareshë e Përgjithshme e FBK.
Dy trajnerë të përzgjedhur nga FIBA Europe mbajtën ligjërata për trajnerët pjesëmarrës, duke ndarë përvoja dhe praktika bashkëkohore në zhvillimin e basketbollit të të rinjve.
“Në emër të FIBA Europe, ne po përpiqemi t’u japim trajnerëve nga vende të ndryshme detyra, informacione dhe udhëzime se si të punojnë me fëmijët, sepse kjo është një periudhë shumë e ndjeshme. Ne po përpiqemi t’u ofrojmë atyre njohuri se çfarë të bëjnë, si ta bëjnë dhe si t’i zgjidhin problemet e përditshme me fëmijët, pasi të gjithë trajnerët që janë këtu janë emëruar nga federatat përkatëse, dhe me shumë gjasë do të punojnë në programet e ekipeve kombëtare. Prandaj, qëllimi ynë është t’u japim atyre drejtim dhe udhëzime për këtë, ky është roli ynë” – u shpreh Nenad Trunic, trajner nga Serbia.
“Jam i lumtur që jam këtu dhe që jam ftuar. Shpresoj që mund t’u jap trajnerëve disa ide, ndoshta disa gjëra për të reflektuar, si dhe motivim për ta, që të vazhdojnë punën e tyre dhe të përmirësohen, sepse në fund të ditës, të gjithë po punojmë së bashku. Mendoj se një nga shprehjet që u përmend shumë sot ishte se “nuk ndalon kurrë së mësuari”, dhe kjo vlen për të gjithë. Mendoj se sa më shumë takime dhe ngjarje të tilla të organizojmë dhe të marrim pjesë në to, aq më shumë kemi mundësi të mësojmë” – shtoi tutje Matthias Zollner, trajner nga Gjermania.
Ngjarje të tilla motivojnë të vazhdohet zhvillimi i basketbollit dhe të dëshmohet se Kosova është e gatshme për ngjarje ndërkombëtare të nivelit më të lartë./Katror.info.
