Përfaqësues të Policisë së Kosovës po marrin pjesë në konferencën e 45-të të Policive të Kryeqyteteve Evropiane, e cila ka filluar më 27 maj në Madrid të Spanjës. Në këtë ngjarje të nivelit të lartë po marrin pjesë shefa të policive të kryeqyteteve nga mbarë Evropa, shkruan Katror.info.
Policia e Kosovës përfaqësohet nga Nënkolonel Basri Shabani, Drejtor i Drejtorisë Rajonale të Policisë së Prishtinës, dhe Major Bekim Bislimi, Drejtor i Drejtorisë së Kryeqytetit. Ata janë pjesë e diskutimeve që kanë për qëllim shkëmbimin e përvojave dhe përmirësimin e bashkëpunimit ndërmjet policive të kryeqyteteve në fushën e sigurisë publike.
Në fokus të konferencës kanë qenë trajtimi i rasteve të dhunës në familje dhe dhunës me bazë gjinore, siguria kibernetike si një nga sfidat më të reja në fushën e sigurisë, si dhe përmirësimi i sigurisë në trafikun rrugor në mjediset urbane. Diskutimet janë përqendruar në identifikimin e metodave dhe masave të reja që ndihmojnë në koordinimin më të mirë dhe në ngritjen e kualitetit të bashkëpunimit ndërkombëtar në parandalimin dhe luftimin e dukurive negative.
Mundesh me e lexu edhe…
Konferenca pritet të përmbyllet nesër me miratimin e një deklarate të përbashkët nga të gjitha shtetet pjesëmarrëse, e cila do të përfshijë pikat kryesore të trajtuara gjatë punimeve. Konferenca e ardhshme e policive të kryeqyteteve evropiane do të mbahet në vitin 2026 në Helsinki të Finlandës./Katror.info
