Presidentja e Republikës së Kosovës, Vjosa Osmani, ka ndarë momente nga Darka Shtetërore e organizuar në nder të saj nga Presidentja e Zvicrës, Karin Keller-Sutter, dhe Këshilli Federal zviceran, ku morën pjesë edhe shumë pjesëtarë të mërgatës shqiptare që jeton dhe vepron në Zvicër, shkruan Katror.info.
“Mbrëmë, në Darkën Shtetërore të organizuar nga Presidentja e Zvicrës, Karin Keller-Sutter dhe Këshilli Federal zviceran, së bashku me shumë pjesëtarë të mërgatës sonë, ngremë dolli për miqësinë mes popujve tanë dhe për të ardhmen e partneritetit në mes shteteve tona,” shkroi Osmani në rrjetet sociale.
Ngjarja u mbajt në kuadër të vizitës së parë shtetërore të një presidenti të Kosovës në Zvicër, një vizitë që po konsiderohet historike dhe me rëndësi të madhe diplomatike për thellimin e marrëdhënieve dypalëshe.
Mundesh me e lexu edhe…
Darka shtetërore ishte një tjetër moment i rëndësishëm i kësaj vizite, duke reflektuar respektin dhe lidhjet e forta që janë ndërtuar ndër vite mes Kosovës dhe Zvicrës, si dhe duke nderuar rolin kyç të mërgatës shqiptare në këtë partneritet të qëndrueshëm./Katror.info
