Presidentja e Republikës së Kosovës, Vjosa Osmani, ka shprehur mirënjohje të thellë për mikpritjen e ngrohtë dhe pritjen shtetërore në Zvicër, në fillim të vizitës së saj zyrtare, e para e këtij niveli nga një president i Kosovës në këtë shtet, shkruan Katror.info.
“Faleminderit për mikpritjen, miqësinë dhe nderimin, Presidente Keller-Sutter! Kjo vizitë e parë shtetërore në Zvicër që po fillon në rezidencën zyrtare të Këshillit Federal të Zvicrës është dëshmi se bashkë po shkruajmë kapitullin e ri të historisë së partneritetit midis shteteve dhe popujve tanë,” shkroi Osmani në një postim në rrjetet sociale, duke theksuar rëndësinë simbolike dhe politike të kësaj vizite.
Presidentja Osmani u prit me nderime të larta shtetërore në sheshin Bundesplatz në Bernë, ku flamujt e Kosovës dhe Zvicrës valëviteshin krah për krah, si simbol i miqësisë dhe bashkëpunimit të qëndrueshëm ndërmjet dy vendeve.
Mundesh me e lexu edhe…
Vizita përfshin takime me presidenten zvicerane Karin Keller-Sutter, Këshillin Federal dhe një fjalim të Presidentes Osmani në Parlamentin e Zvicrës, si dhe një konferencë të përbashkët për media. Në agjendë janë gjithashtu vizita në institucione akademike dhe ekonomike, si dhe një takim me mërgatën shqiptare në Zvicër./Katror.info
