Presidentja e Zvicrës, Karin Keller-Sutter, pasi falënderoi presidenten e Kosovës, Vjosa Osmani, që ka pranuar ftesën për vizitën shtetërore, vlerësoi lart lidhjen e vendit të saj me Kosovën.
“Kosova është një vend i ri, më i riu në kontinentin europian, por kontaktet që na lidhin kanë një të kaluar të gjatë. Që në vitet 1960 kosovarët erdhën në Zvicër, më vonë edhe shumë refugjatë gjetën një shtëpi të re tek ne” – tha Keller-Sutter.
Presidentja e Zvicrës vlerësoi lart shoqërinë kosovare që tanimë është integruar në këtë shtet dhe sipas saj, Zvicra nuk mund të paramendohet pa kosovarët.
Mundesh me e lexu edhe…
“Sot Zvicra nuk mund të paramendohet pa njerëzit me prejardhje nga Kosova. 160 mijë deri në 250 mijë, varësisht se si i numëroni, ata kanë luajtur një rol të rëndësishme në formësimin e vendit tonë” – tha presidentja zvicerane, raporton Kallxo.com.
Presidentja Karin Keller-Sutter në këtë konferencë bëri të ditur se me presidenten Vjosa Osmani kanë biseduar edhe për marrëdhëniet ekonomike, për çështjen e migracionit dhe për projekte me të cilat Zvicra mbështet demokracinë dhe paqen.
Paqja e qëndrueshme në rajon dhe një perspektivë europiane për vendet e Ballkanit Perëndimore, për Zvicrën kanë prioritet të lartë, sipas presidentes Keller-Sutter.
Ajo garantoi se do ta vazhdojnë mbështetjen ndaj Kosovës në rrugëtimin për forcimin e shtetit.
Ndërsa, pjesë e diskutimeve mes dy presidenteve ishin edhe zhvillimet aktuale në botë, përfshirë këtu luftën në Ukrainë.
Presidentja e Kosovës, Vjosa Osmani, po qëndron për vizitë zyrtare në Zvicërs, ku është pritur me nderimet më të larta shtetërore.
Në fjalimin e mbajtur në Pallatin Federal të Zvicrës, presidentja Osmani tha se Zvicra u bë avokat i fuqishëm për lirinë e Kosovës dhe për shumë qytetarë të Kosovës, të cilët gjatë luftës gjetën strehë në këtë vend.
“Këtu në Zvicër, shumë nga përpjekjet për lirinë e Kosovës gjetën përkrahje dhe mbrojtje dhe ne asnjëherë nuk do ta harrojmë këtë” – theksoi presidentja Osmani.
Tutje, presidentja Osmani përmendi edhe bashkëpunimin e mirë mes dy shteteve, në të cilin, sipas saj, kanë ndikuar edhe numri i madh i shqiptarëve të Kosovës që janë pjesë e kësaj shoqërie.
Një pjesë të fjalimit, presidentja, ua kushtoi edhe sukseseve të futbollistëve shqiptarë në Zvicër.
Presidentja Osmani kishte edhe një mesazh për të gjithë qytetarët me origjinë nga Kosova që jetojnë në Zvicër.
“Pavarësisht profesionit tuaj, të kaluarës tuaj, përgatitjes tuaj profesionale, duhet të jeni një forcë për të mirë, shembull të integrimit pozitiv. Sepse jeta në këtë vend nuk është vetëm privilegj, por është edhe përgjegjësi” – tha ajo.
Ndër të tjera, Osmani u shpreh se çdo demokraci ka nevojë për përkrahje dhe partneritet dhe për këtë mbështetje që Zvicra ndër vite i ka dhënë Kosovës i është mirënjohëse. /Katror.info
Përgatiti:
