Festivali Ndërkombëtar i Filmit në Prishtinë, PriFest, ka hapur edicionin e 17-të duke e shndërruar sërish kryeqytetin në qendër të kinemasë ballkanike e ndërkombëtare.
Si ngjarja më e madhe dhe më e rëndësishme e industrisë së filmit në Kosovë, PriFest nuk është vetëm një festë e kinemasë, por edhe një platformë për dialog shoqëror e kulturor, shkruan Katror.info.
Për Fatos Berishën, drejtorin e festivalit, edhe këtë vit puna e palodhshme ka rezultuar në një sukses të madh.
Mundesh me e lexu edhe…
Programi i këtij edicioni, si çdo herë, sjell për publikun filmat më të rinj nga Evropa, Ballkani dhe bota. Organizatorët, pas një përkushtimi të madh për ta sjellë kinemanë më afër qytetarëve, theksuan se janë të kënaqur me pjesëmarrjen e madhe të artistëve dhe me interesimin e publikut.
Festivali u hap hapet me premierën botërore të filmit “Përqafimi i Ariut”, duke nisur festivalin me një histori të fuqishme dhe prekëse nga Kosova dhe Shqipëria.
Regjisori Ilirjan Himaj eksploron temat e mbijetesës, dashurisë dhe luftës për lirinë personale.
Producentja e filmit, Teuta Krasniqi, e cila njëkohësisht ka edhe një rol në film, e emocionuar vlerësoi pjesëmarrjen në një festival të rëndësishëm si PriFest.
Aktorët e tjerë vlerësuan vazhdimësinë e PriFest-it ndër vite, duke e cilësuar atë si një pasuri të çmuar për Prishtinën dhe për gjithë Kosovën.
E pranishme ishte edhe Ministrja e Drejtësisë, Albulena Haxhiu, e cila si një pjesëmarrëse e rregullt e festivalit, e vlerësoi PriFest-in si një ngjarje të rëndësishme për kinemanë dhe kulturën kosovare.
Edicioni i 17-të i PriFest do të zhvillohet deri më 14 shtator, duke sjellë sërish filma të rinj, programe të shumta, një juri të zgjedhur dhe aktivitete gjatë gjithë ditës dhe premton të vazhdojë traditën e festivalit si një pikë referimi për kinemanë dhe kulturën kosovare./Katror.info.
