Festivali Ndërkombëtar i Teatrit në Ambient të Hapur – PrizrenFest, rikthehet me edicionin e tij të katërt nga 21 deri më 28 korrik 2025, duke sjellë në qytetin historik të Prizrenit një javë intensive me shfaqje teatrale, punëtori dhe bashkëpunim ndërkombëtar.
Festivali hapet më 21 korrik, në ora 21:00, me një performancë të veçantë baleti nga Eno Peçi dhe Trupa e Baletit e Teatrit Kombëtar të Tiranës, në një mbrëmje të hapur për publikun.
Këtë vit, trupa nga 11 vende, përfshirë Italinë, Francën, Palestinën, Anglinë, Maqedoninë e Veriut, Greqinë, Bullgarinë, Turqinë, Shqipërinë dhe Kosovën, do të sjellin shfaqje për të gjitha grupmoshat. Programi përfshin gjithashtu punëtori, konferenca dhe panele që trajtojnë temat aktuale të teatrit bashkëkohor dhe atij tradicional.
Mundesh me e lexu edhe…
Shfaqjet do të mbahen në disa nga hapësirat më ikonike të Prizrenit, si: Teatri mbi Lum, Teatri “Bekim Fehmiu”, Katedralja Katolike, Shtëpia e të Moshuarve “Jetimat e Ballkanit”, Amfiteatri – ITP, Burgu i Qytetit, Lidhja e Prizrenit, Hangari i Autostrada Biennale – ITP, dhe Shkolla e Muzikës “Lorenc Antoni”. Ky shpërndarje në qytet synon përfshirjen e gjerë të komunitetit dhe adresimin e çështjeve me rëndësi sociale përmes artit.
Një risi e veçantë në programin për fëmijë është shfaqja ‘TRE’ nga Maqedonia e Veriut, shfaqja e parë profesionale për fëmijë në gjuhën e shenjave, e cila u dedikohet të shurdhërve dhe fëmijëve me dëgjim të dobët. Aktorët performojnë njëkohësisht në gjuhën e folur dhe atë të shenjave, duke e kthyer shfaqjen në një përvojë didaktike dhe përfshirëse, ku fëmijët ndërveprojnë dhe mësojnë alfabetin e gjuhës së shenjave.
PrizrenFest 2025 shënon jo vetëm një festë të teatrit dhe artit ndërkombëtar, por edhe një përkushtim të qartë ndaj përfshirjes, qasjes dhe diversitetit kulturor./RTK/Katror.info
