Prishtina, edhe një herë, bëhet epiqendra e artit dhe kulturës. Fotoisti – Festivali Ndërkombëtar i Fotografisë, në edicionin e dytë të tij, solli qasjen sa artistike, aq edhe unike.
Duke ripërdorur një slogan të Mbretërisë së Bashkuar, “Qëndro i qetë dhe buzëqesh”, përmes të cilit u jepej motiv ushtarëve gjatë Luftës së Dytë Botërore, fotografi Korab Basha sjell fytyrat e buzëqeshura të djemve e vajzave të Forcës së Sigurisë së Kosovës.
Këta pjesëtarë, me buzëqeshjen e tyre përveç se përfaqësojnë paraqesin forcë dhe krenari, janë pasqyrë e kosovarëve që duan të lënë pas të kaluarën dhe të shikojnë nga e ardhmja – me një buzëqeshje.
Fotoisti, festivali i organizuar nga fotografi Burim Myftiu i solli Prishtinës një frymë artistike, ku përmes fotografive të shkrepura në kohë dhe vende të ndryshme, mund të reflektosh për atë të kaluarën, të tashmen dhe të ardhmen.
Kryeministri Albin Kurti, e vlerëson fotografinë si një historian të heshtur të rrugëtimit kosovar, duke thënë se çdo foto është një dëshmi e vlerave demokratike të Kosovës, të këtij populli, i cili ka vuajtur shumë, e megjithatë e ka fuqinë për të shikuar përpara dhe për të ecur përpara. E pikërisht fotografia e kap edhe thelbin e rritjes.
Si festivali më i madh i fotografisë në Ballkan, FOTOIST sjell në Prishtinë fotografë të talentuar, artistë dhe entuziastë të kulturës nga e gjithë bota. Gjatë këtij festivali dinamik 5-ditor, pjesëmarrësit do të kenë mundësinë të shijojnë një program të pasur me ekspozita fotografike, ligjërata, debate, shfaqje filmash dhe rishikime portofolesh. Ky festival nuk është vetëm një kujtim i asaj që ka ndodhur, por një dritë e fuqishme optimizmi.
“Ky festival është një dëshmi e fuqisë së artit për të shëruar, për të ndërtuar ura mes të kaluarës dhe së ardhmes, dhe për të frymëzuar një shoqëri që nuk e humbet shpresën, pavarësisht nga sfidat, “ përshkruan fuqinë e artit artisti i mirënjohur i fushës, Ron Haviv i cili në këtë festival erdhi me krijimtarinë e tij.
Fotografitë e ekspozuara, edhe pse kapin momente të vështira, shërbejnë si një reflektim i forcës dhe qëndresës njerëzore. Ato tregojnë sesi, nga errësira më e thellë, njerëzit kanë gjetur rrugën drejt dritës, duke ndërtuar një të ardhme më të ndritur dhe duke ndarë histori që frymëzojnë.
Në këtë edicion të dytë të Fotoistit marrin pjesë emra të mirënjohur të fushës si, Ron Haviv, Barry Lewis, Paul Lowe, Amra Abadzic e Imre Szabo, si dhe artistë vendas të cilët prezantojnë ekspozitat e tyre, si Atdhe Mulla e Eni Nurkollari, ndër të tjerë./Katror.info
Përgatiti:
