Kosova ka hyrë zyrtarisht në hartën evropiane të cilësisë në arsimin e lartë. Agjencia e Kosovës për Akreditim (AKA) është pranuar si anëtare me të drejta të plota në Regjistrin Evropian për Sigurimin e Cilësisë në Arsimin e Lartë (EQAR), një arritje që e vendos sistemin kosovar të akreditimit përkrah institucioneve më të avancuara evropiane.
Vendimi historik vjen pas një vlerësimi pozitiv nga ekipi i pavarur i Asociacionit Evropian për Sigurimin e Cilësisë (ENQA), dhe rikthen Kosovën në EQAR pas përjashtimit të saj në vitin 2018, për shkak të ndërhyrjeve politike në punën e Agjencisë.
Në letrën zyrtare të EQAR-it, dërguar drejtorit të përgjithshëm të AKA-së, Naim Gashi, presidenti i EQAR-it, Stéphane Lauwick shkruan: “Aplikimi juaj është aprovuar dhe përfshirja juaj do të jetë e vlefshme deri më 31.12.2029. Ju lutem pranoni urimet e mia për aplikimin tuaj të suksesshëm dhe përgëzimet e mia të përzemërta për punën tuaj në emër të të gjithë anëtarëve të Komitetit të Regjistrit.”
Mundesh me e lexu edhe…
🎉 Kosova, anëtare me të drejta të plota në EQAR! 🇽🇰🇪🇺 Me krenari ndajmë lajmin historik: Kosova është pranuar zyrtarisht në Regjistrin Evropian për Sigurimin e Cilësisë në Arsimin e Lartë (EQAR) – duke u bërë vendi i parë në Ballkanin Perëndimor që arrin këtë status prestigjioz! Kjo arritje e jashtëzakonshme vërteton përkushtimin e Kosovës për arsim cilësor dhe standarde evropiane. Diplomat tona tashmë bartin vulën e cilësisë evropiane, duke hapur dyert e së ardhmes për studentët tanë. Faleminderit të gjithëve që kontribuuan në këtë sukses kombëtar! 🇽🇰 #EQAR #Kosova #ArsimiCilësor #AKA #EuropeanStandards
Posted by Agjencia e Kosovës për Akreditim – Kosovo Accreditation Agency on Monday, July 14, 2025
Një arritje me ndikim kombëtar e ndërkombëtar
Përmes këtij anëtarësimi, AKA fiton statusin e një institucioni të besueshëm ndërkombëtar, i aftë për të vlerësuar cilësinë në arsimin e lartë jo vetëm brenda vendit, por edhe në nivel evropian.
Sipas vetë Agjencisë, kjo është një njohje ndërkombëtare e përkushtimit dhe profesionalizmit në përmbushjen e standardeve më të larta evropiane për sigurimin e cilësisë, që rrit kredibilitetin e arsimit të lartë në Kosovë.
Për studentët, kjo nënkupton njohje të garantuar ndërkombëtare të diplomave, si në aspektin akademik ashtu edhe në atë profesional, duke lehtësuar mobilitetin, punësimin dhe avancimin në studime të mëtejme jashtë vendit.
Institucionet kosovare përfitojnë akses në fondet dhe programet evropiane
Anëtarësimi i AKA-së në EQAR gjithashtu hap rrugën për pjesëmarrje të plotë të universiteteve kosovare në programet arsimore të Bashkimit Evropian, si Erasmus+, Horizon Europe dhe të tjera. Po ashtu, përfitohen mundësi për partneritete ndërkombëtare, zhvillim akademik dhe bashkëpunime shkencore, raporton Katror.info.
Kosova, e para në rajon që rikthehet në EQAR
Kryetarja e Këshillit Shtetëror të Cilësisë, prof. Hasnije Ilazi, e cilësoi këtë si një sukses kombëtar:
“Ky është një sukses nacional dhe një arritje kolosale për studentët dhe të diplomuarit kosovarë, pasi që diplomat e tyre tashmë bartin vulën e cilësisë evropiane.”
Ajo shtoi se Kosova është vendi i parë në Ballkanin Perëndimor që rikthehet në këtë regjistër prestigjioz, pas vitesh pune dhe përpjekjesh institucionale.
Një proces me përkushtim dhe transparencë
Drejtori i AKA-së, Naim Gashi, tha se kjo arritje është rezultat i një procesi të gjatë dhe të strukturuar që nisi në vitin 2020. “Në vitin 2020 hartuam planin për përmbushjen e 14 standardeve… më 1 korrik 2024, një ekip prej pesë ekspertësh ndërkombëtarë vizitoi Kosovën dhe dha një vlerësim pozitiv.”
Gashi e përshkroi këtë moment si një “arritje historike”, dhe theksoi se diplomat e Kosovës tani bartin vulën e cilësisë evropiane – një simbol besueshmërie për punëdhënësit dhe universitetet jashtë vendit.
Ai falënderoi të gjithë partnerët institucionalë dhe ndërkombëtarë që kontribuan në këtë sukses, përfshirë ministren Arbërie Nagavci, Qeverinë, Kuvendin, agjencitë homologe nga Kroacia, Austria, Gjermania, si dhe USAID-in.
Rikthimi pas përjashtimit të vitit 2018
Në vitin 2018, EQAR dhe ENQA përjashtuan Agjencinë e Kosovës për Akreditim për shkak të ndërhyrjeve politike, përfshirë shkarkimin e Bordit nga qeveria e atëhershme. Pas këtij akti, Kosova humbi përkohësisht njohjen ndërkombëtare të diplomave.
Kryeministri në detyrë, Albin Kurti, në një reagim në rrjetet sociale, e cilësoi rikthimin si një hap të rëndësishëm për reformën në arsim: “7 vite më vonë, me qeverisjen tonë, kjo agjenci rikthehet si anëtare me të drejta të plota… Jemi të përkushtuar për t’u përafruar me standardet më të larta evropiane në arsim.”
Me këtë vendim, Kosova jo vetëm që rikthen besueshmërinë e institucioneve të saj arsimore, por pozicionohet fuqishëm në hartën akademike evropiane, duke hapur një epokë të re për arsimin e lartë në vend./Katror.info
