Me ftesë të ZRRE-së, Ministrja në detyrë e Ekonomisë, Artane Rizvanolli, mori pjesë në një takim me furnizuesit e licencuar të energjisë elektrike në Kosovë, ku u diskutuan sfidat dhe pengesat që përballen kompanitë për të konkurruar në tregun e lirë të energjisë, shkruan Katror.info.
Qëllimi kryesor i këtij takimi ishte thellimi i dialogut mes institucioneve shtetërore dhe operatorëve privatë, për të ndihmuar konsumatorët në zgjedhjen e ofertave më të favorshme.
Ministrja Rizvanolli nënvizoi rëndësinë e transparencës dhe informimit të konsumatorëve, duke inkurajuar furnizuesit që të ofrojnë kontrata të qarta dhe shpjegime të detajuara mbi komponentët e kostos së energjisë në tregun e lirë. “Duam të sigurojmë që tregu të jetë sa më konkurrues, që bizneset dhe qytetarët të kenë mundësi të zgjedhin ofertat më të përshtatshme dhe me çmimin më të lirë,” tha Rizvanolli.
Mundesh me e lexu edhe…
Megjithatë, ky vendim i ZRRE-së për rregullimin e tregut të energjisë ka shkaktuar reagime të shumta nga ana e bizneseve dhe qytetarëve.
Shumë biznese e konsiderojnë këtë vendim të pafavorshëm, duke argumentuar se rregullat e vendosura nga ZRRE-ja po kufizojnë konkurrencën dhe po ndikojnë negativisht në ofertat dhe çmimet në treg. Po ashtu, qytetarët shprehin shqetësime për mungesë transparence në procesin e përcaktimit të tarifave dhe ndikimin e mundshëm të këtij vendimi në faturat mujore të energjisë./Katror.info
