Përfaqësues të sektorit të turizmit në Kosovë vlerësojnë se themelimi i Ministrisë së Turizmit është domosdoshmëri për zhvillimin e industrisë së turizmit në vend. Ata theksojnë se turizmi është një nga shtyllat kryesore të ekonomisë dhe një faktor i rëndësishëm për punësimin, ndaj duhet të ketë një institucion të veçantë që merret me zhvillimin e tij.
Ndryshe nga vendet e rajonit, ku turizmi trajtohet në nivel ministror, në Kosovë ai funksionon vetëm si një departament brenda Ministrisë së Industrisë, Ndërmarrësisë dhe Tregtisë (MINT), me staf të pamjaftueshëm dhe buxhet të kufizuar. Sipas të dhënave nga MINT, aktualisht në Departamentin e Turizmit janë katër punonjës, ndërsa sipas rregullores parashihen nëntë, me një buxhet prej 44 mijë euro për vitin 2025.
Kryetari i Unionit të Turizmit të Kosovës, Baki Hoti, dhe kryetari i Odës së Hotelerisë dhe Turizmit, Hysen Sogojeva, bëjnë thirrje për themelimin e një ministrie të veçantë që do të mundësojë një fokus më të madh institucional në promovimin dhe zhvillimin e turizmit. Ata theksojnë se udhëheqësit më të lartë të vendit duhet të angazhohen më shumë në promovimin e kulturës, traditës dhe atraksioneve turistike të Kosovës.
Mundesh me e lexu edhe…
Ndërkaq, Zyra e Kryeministrit ka bërë të ditur se me hyrjen në fuqi të Ligjit për Investime të Qëndrueshme janë duke u hartuar aktet nënligjore për themelimin e dy agjencive të reja, ku njëra do të përfshijë edhe përgjegjësitë për promovimin e turizmit. Gjithashtu, është në proces shqyrtimi Ligji i Turizmit, i cili do të përfshijë masa dhe programe për zhvillimin e sektorit deri në vitin 2030.
Në krahasim me Kosovën, vendet e rajonit si Shqipëria, Maqedonia e Veriut, Mali i Zi dhe Serbia kanë të institucionalizuar turizmin përmes ministrive të veçanta, duke arritur suksese të mëdha në promovimin dhe zhvillimin e këtij sektori. Për shembull, Shqipëria në vitin 2024 priti afro 12 milionë vizitorë të huaj dhe gjeneroi rreth 3.8 miliardë euro nga turizmi vetëm në nëntë muaj.
Sektori i turizmit në Kosovë kërkon urgjentisht që të përmirësohet struktura institucionale dhe mbështetja nga niveli më i lartë i qeverisë, për të shfrytëzuar potencialin e madh që ka vendi në këtë fushë./KP/Katror.info
