Kosova po vazhdon të forcohet fuqishëm në aspektin e mbrojtjes. Ekspertët e sigurisë vlerësojnë se veç blerjeve të fundit të Ministrisë së Mbrojtjes, vendi ynë duhet të vazhdojë me këtë intensitet, për forcimin e mbrojtjes.
Rritja e kapaciteteve mbrojtëse po shihet si hap kyç për të ardhmen dhe sigurinë e vendit. Forca e Sigurisë së Kosovës, e cila pritet ta përfundojë fazën e tranzicionit në vitin 2028, po pajiset çdo ditë e më shumë me armatim modern dhe artileri të rëndë.
Ish-ushtarakë thonë se kjo forcë duhet të vazhdojë t`i zgjerojë kapacitetet në të gjitha drejtimet, veçanërisht në kontekstin e sfidave të sigurisë që po shfaqen në rajon dhe më gjerë.
Mundesh me e lexu edhe…
Pavarësisht se buxheti për mbrojtje për vitin 2025 është më i larti ndonjëherë, duke arritur në 208 milionë euro, ish-komandanti i FSK-së, Kadri Kastrati, thekson se kjo shumë duhet të vazhdojë të rritet.
Sipas tij, investimi në mbrojtje është domosdoshmëri në këtë periudhë për sigurinë kombëtare.
“Është një fazë shumë e kushtueshme dhe unë shumë herë e kom thonë 2 përqind e prodhimit është i pamjaftueshëm, por qeveria apo qeveria që vjen duhet që minimumi për FSK të jetë 5 përqindë…”, theksoi ai.
Në anën tjetër, njohësi i çështjeve të sigurisë thotë se këto blerje dhe blerjet e tjera në vazhdim, e bëjnë të qëndrueshëm dhe efikas planin e sigurisë së vendit.
“Ne po shkojmë gjithandej përmbushjes standardeve të paracaktuara duke i përshtatur situatës dhe nevojave të luftërave çfarë po zhvillohen mes Rusisë dhe Ukrainës dhe po tregojnë një momentum të ri të përdorimit të raketave dhe një riorientim të armatimit modern…”, theksoi per RTK Nuredin Ibishi, njohës i çështjeve të sigurisë.
Të premten e kaluar, në kazermën “Adem Jashari”në Prishtinë, është bërë dorëzim-pranimi i kontingjentit të dytë prej 50 autoblindave të blera nga ushtria e Shteteve të Bashkuara të Amerikës për FSK-në.
Përveç kësaj, Kosova ka porositur nga SHBA-ja edhe 246 raketa kundërtanke të Javelin, e po ashtu Kosova, Shqipëria dhe Kroacia po planifikojnë blerje të përbashkët të armëve amerikane, duke e konkretizuar në praktikë bashkëpunimin në fushën e mbrojtjes, për të cilin u dakorduan në letër para rreth pesë muajsh, kur ministrat e Mbrojtjes nënshkruan një deklaratë të përbashkët më 18 mars në Tiranë./Katror.info
