Më 9 tetor 2025, Klubi i Pingpongut Priping organizoi ngjarjen tashmë tradicionale “PINK-PONG Breast Cancer Awareness Table Tennis Tournament”, me një mision të rëndësishëm: rritjen e vetëdijesimit për kancerin e gjirit, një sëmundje që prek shumë gra dhe vajza në të gjithë botën.
Ngjyra rozë kishte mbuluar çdo skaj të sallës së pingpongut, duke simbolizuar solidaritetin dhe përkushtimin e komunitetit sportiv në luftën kundër kësaj sëmundjeje.
Përveç ndeshjeve të pingpongut, pati edhe sesion informues me pjesëmarrjen e znj. Nafije Latifi nga organizata Jeta Vita e cila ka ndarë informacione të vlefshme për rëndësinë e kontrollit të hershëm, parandalimin dhe trajtim më efikas të kancerit të gjirit. Pjesë e këtij aktiviteti ishte edhe ish-Presidetja Atifete Jahjaga.
Pingpongu u shndërrua në një mjet të fuqishëm për sensibilizim shoqëror.
Ngjyra rozë u reflektua në topat e pingpongut, reketat dhe uniformat, duke u kthyer në një simbol të përbashkët të shpresës dhe mbështetjes për të gjitha gratë që përballen me këtë sëmundje.
Mundesh me e lexu edhe…
Një vëmendje e veçantë iu kushtua pjesëmarrjes së grave dhe vajzave, të cilat përmes rrjeteve të tyre shoqërore ndihmojnë në përhapjen e informacionit dhe ndërgjegjësimit mbi rëndësinë e kontrolleve të rregullta.
Kjo e bën PINK-PONG-un një aktivitet me ndikim real në komunitet dhe në përpjekjet për parandalimin dhe zbulimin e hershëm të kancerit të gjirit.
Kastriot Orana, kryetar i Klubit Priping, u shpreh i kënaqur me pjesëmarrjen dhe theksoi rolin e rëndësishëm që kanë organizatat sportive dhe partnerët shëndetësorë në promovimin e kontrollave te hershme. Ai falënderoi Shoqatën Jeta Vita, Komunën e Prishtinës, dhe partnerët për bashkëpunimin e tyre të vazhdueshëm.
Në fund të aktivitetit, të gjithë pjesëmarrësit u shpërblyen me certifikata me simbolin rozë, si kujtim dhe motiv për të vazhduar mbështetjen ndaj kësaj kauze. /Katror.info
