Hardh Fest kthehet më fuqishëm se kurrë me edicionin e radhës më 5, 6 dhe 7 shtator 2025, dhe këtë vit e hapim me një lajm që do ta ndezë atmosferën: TOMMY CASH, fenomeni estonez që bëri bujë në Eurovision me hitin “Espresso Macchiato”, do të jetë pjesë e festivalit më të madh në vend!
Me një performancë që theu internetin, rrëmbeu audiencën dhe solli një valë të re të energjisë artistike, Tommy Cash u bë emri më i komentuar i Eurovision 2025. Stili i tij, energjia elektrizuese dhe estetika vizuale unike do të marrin jetë në skenën e Rahovecit, duke e kthyer Hardh Fest në pikën më të nxehtë të shtatorit – jo vetëm në Kosovë.
Pas një edicioni jubilar jashtëzakonisht të suksesshëm në vitin 2024, Hardh Fest 2025 premton një super edicion me shumë risi. Dhe më e mira nga të gjitha – festivali mbetet pa bileta!
Mundesh me e lexu edhe…
Hardh Fest është një ngjarje kulturore që kultivon dhe kujton traditën e Rahovecit, promovon verërat, rrushin dhe produktet lokale, dhe e kurorëzon gjithçka me muzikë LIVE dhe një përvojë unike për të gjithë vizitorët.
Festivali kontribuon në promovimin dhe zhvillimin ekonomik të Rahovecit dhe Kosovës.
Hardh Fest mbahet nën patronatin e kryetarit të Komunës, Smajl Latifi, dhe me përkrahjen e Komunës së Rahovecit dhe Ministrisë së Kulturës, Rinisë dhe Sportit. Sponsor Gjeneral: BPB, Partner i festivalit: Stone Castle vineyards and winery, sponsor ekskluziv: Vuse, Coca-Cola.
Për emrat e tjerë të line-up-it dhe aktivitetet që do të pasojnë, do të informoheni me kohë./Katror.info
