Mbase është për të mirë që Netflix dhe krijuesi i serialit, Hwang Dong-hyuk, qëndruan të vendosur në vendimin për ta përmbyllur “Squid Game” pas sezonit të tretë. Ky serial është kthyer në një “minierë ari” për platformën dhe mbetet ndoshta shembulli më i suksesshëm i një produksioni që ka gjetur audiencën në mënyrë organike.
“Squid Game” debutoi me shifra të jashtëzakonshme shikueshmërie në vitin 2021 dhe u bë menjëherë seriali origjinal më i ndjekur në historinë e Netflix-it. Sezoni i dytë dhe i tretë u xhiruan njëri pas tjetrit, ndërsa Netflix kishte si synim ta zgjeronte më tej këtë univers. Por, sezoni i tretë, i publikuar javën e kaluar, nuk ka arritur të lidhet me po të njëjtin intensitet me miliona fansa të serialit në mbarë botën. Edhe pse mban ende një vlerësim pozitiv nga kritikët në Rotten Tomatoes, audienca nuk po përmbahet në kritikat e saj.
Në një kthesë ironike, që përkon me vetë temat e serialit – një shoqëri distopike në Korenë e Jugut, ku njerëzit e zhytur në borxhe garojnë deri në vdekje në lojëra mizore – sezoni i tretë ka marrë një vlerësim shumë të ulët nga audienca: vetëm 50%. Ndërkohë, nota e kritikëve është më e lartë, në 82%. Përmbledhja e faqes zyrtare për këtë sezon thotë: “Lojërat arrijnë një kulm të errët në këtë sezon klimaktik, duke përsëritur motive të njohura, por me një egërsi që thekson më tej temat e regjisorit Hwang Dong-hyuk”.
Mundesh me e lexu edhe…
Në analizën e saj, Therese Lacson nga Collider shkruan: “Sezoni i tretë merr çfarë ka funksionuar nga dy sezonet e mëparshme dhe e çon në maksimum – madje e kalon atë”. Në krahasim, sezoni i parë kishte një vlerësim prej 95% nga kritikët dhe 84% nga audienca, ndërsa sezoni i dytë rezultoi me 83% nga kritikët dhe vetëm 63% nga publiku.
“Squid Game” ka qenë gjithmonë një kritikë e ashpër ndaj kapitalizmit dhe babëzisë korporative, por rënia e entuziazmit të audiencës mund të jetë shqetësuese për Netflix-in, nëse ka plane për ta vazhduar më tej këtë univers.
Një nga komentet në Rotten Tomatoes shprehej: “Sezoni 3 i Squid Game duket si një hije e vetvetes. Ndryshe nga ritmi mbërthyes i sezoneve 1 dhe 2, ky sezon zvarritet me rrëfim të ngadalshëm dhe pa ndonjë shpërblim të vërtetë.” Një tjetër shton: “Sezoni 3 është rrëmujë totale. Nuk shpjegon asgjë nga fundi i sezonit të dytë dhe vendimet e personazhit kryesor janë të pakuptimta dhe të pasinkronizuara”.
“Squid Game” debutoi në një periudhë kur bota po përpiqej ende të gjente ekuilibrin pas pandemisë, në një kohë që shënoi edhe ngritjen e valës koreane të popullaritetit (“Korean Wave”). Seriali preku telat emocionalë të audiencës ndërkombëtare dhe u bë programi më i shikuar i Netflix-it, duke kaluar edhe “Stranger Things” dhe “Money Heist”.
Ndërkohë që fansat prisnin sezonin vijues, Netflix publikoi një version realiteti të titulluar “Squid Game: The Challenge”. Po ashtu, qarkulluan zëra për një version në gjuhën angleze që mund të realizohej nga vetë David Fincher. Ndërkaq, regjisori Hwang Dong-hyuk ka pranuar se është duke menduar për një spin-off të mundshëm.
Seriali mund të shikohet në Netflix, ndërsa për më shumë përditësime, ndiqni faqen Collider./Telegrafi/Katror.info
