Një zyrtar amerikan i Mbrojtjes ka përshëndetur për herë të parë nismën e bashkëpunimit ushtarak mes Shqipërisë, Kroacisë dhe Kosovës, duke e cilësuar atë si një hap pozitiv për sigurinë rajonale.
Përmes një deklarate ekskluzive për Albanian Post, ai konfirmoi mbështetjen e SHBA-ve për ‘të gjitha format e koordinimit mbrojtës’ mes vendeve partnere në Ballkan.
“Mbështesim bashkëpunimin mbrojtës mes të gjithë partnerëve tanë ballkanikë”, theksoi zyrtari i Pentagon-it në një përgjigje zyrtare për AP-në.
Mundesh me e lexu edhe…
Kjo deklaratë vjen në një moment kyç për arkitekturën e sigurisë në rajon, duke i dhënë legjitimitet ndërkombëtar nismës shqiptaro-kroate për Mbrojtjen.
Pesë muaj pas nënshkrimit të deklaratës së përbashkët, Shqipëria, Kroacia dhe Kosova kanë kaluar në fazën e zbatimit praktik të bashkëpunimit në fushën e mbrojtjes.
Sipas një raportimi të mëparshëm nga Radio Evropa e Lirë, janë hartuar plane të strukturuara për koordinimin ‘e thelluar’ ushtarak dhe blerje të përbashkëta armatimi, përfshirë edhe nga SHBA-të.
Më 18 korrik në Tiranë u mbajt takimi i parë operacional, ndërsa në shtator pritet të miratohet udhëzuesi zbatues nga të tre ministritë.
Por, çfarë përmban deklarata e përbashkët mes shteteve në detaje?
E ndarë në katër themele kyçe, deklarata në formën e marrëveshjes përqendrohet kryesisht në promovimin e kapaciteteve mbrojtëse dhe bashkëpunimit, rritjen e ndërveprueshmërisë përmes edukimit, kundërpërgjigjes ndaj kërcënimeve hibride dhe ofrimit të mbështetjes së plotë për integrimin euroatlantik (në këtë rast për Shqipërinë dhe Kosovën).
Deklarata është firmosur nga tre ministrat e Mbrojtjes: Ai i Shqipërisë, Pirro Vengu, i Kroacisë Ivan Anusiç dhe i Kosovës, Ejup Maqedonci.
Deklarata më parë është cilësuar si një provokim i hapur nga Serbia dhe si “cenuese e stabilitetit në rajon”.
Megjithatë, ka marrë përgjigje menjëherë, përfshi nga ministri kroat Anusiç, i cili e ka bërë të qartë se as Kroacia dhe as vendet e rajonit, nuk i japin Serbisë llogari se me kë bashkëpunojnë, apo nënshkruajnë deklarata të tilla.
Çfarë përmban deklarata në formën integrale të saj?
Duke njohur marrëdhëniet e forta dhe të qëndrueshme ndërmjet Republikës së Shqipërisë, Republikës së Kroacisë dhe Republikës së Kosovës, të bazuara në vlerat e përbashkëta, orientimet strategjike dhe angazhimet reciproke drejt sigurisë dhe bashkëpunimit rajonal,
Duke riafirmuar synimin tonë për të forcuar bashkëpunimin trepalësh të sigurisë dhe mbrojtjes për të rritur sigurinë dhe stabilitetin në Evropën Juglindore dhe në rajonin Adriatiko-Jonian,
Duke theksuar rëndësinë e përpjekjeve të përbashkëta për t’iu përgjigjur sfidave të reja të sigurisë, kërcënimeve hibride dhe rreziqeve të tjera që mund të dëmtojnë stabilitetin rajonal, evropian dhe ndërkombëtar,
Marrja e veprimeve të menjëhershme për zhvillimin e kapaciteteve mbrojtëse duke pranuar ambiciet që rrjedhin nga Koncepti Strategjik i NATO-s dhe Busulla Strategjike e Bashkimit Evropian, të konceptuara për të rritur aftësinë tonë për të mbrojtur territoret dhe njerëzit tanë, si dhe për të kontribuar për paqen dhe sigurinë ndërkombëtare,
Avancimi i hapave të përbashkët për të rritur bashkëpunimin dhe prodhimin industrial të mbrojtjes në përputhje me Zotimin e NATO-s për Zgjerimin Industrial dhe planin e Bashkimit Evropian për “Riarmatosjen e Evropës”,
Ne jemi të vendosur për t’u siguruar që jemi të pozicionuar mirë për t’u bërë ballë kërcënimeve aktuale dhe në zhvillim, si dhe për të arritur objektivat tona të mbrojtjes dhe sigurisë,
Ne: Ministri i Mbrojtjes i Republikës së Shqipërisë, Zëvendëskryeministri dhe Ministri i Mbrojtjes i Republikës së Kroacisë, si dhe Ministri i Mbrojtjes i Republikës së Kosovës, deklarojmë angazhimin tonë si më poshtë:
1. Promovimi i kapaciteteve mbrojtëse dhe bashkëpunimi për industrinë përkatëse duke:
– Eksploruar zhvillimin dhe blerjen e kapaciteteve mbrojtëse nëpërmjet zgjidhjeve të bashkëpunimit shumëkombësh për të rritur gatishmërinë e forcave tona ushtarake;
– Identifikuar hapësira për bashkëpunimin industrial të mbrojtjes, duke nxitur aksesin në burime dhe zinxhirë furnizimi për të krijuar një industri konkurruese dhe të qëndrueshme të mbrojtjes;
– Rritur përpjekjet për të investuar në teknologji dhe inovacione të reja për të përshpejtuar dhe siguruar një qasje të unifikuar ndaj transformimit të sigurisë dhe mbrojtjes.
2. Rritja e ndërveprueshmërisë nëpërmjet edukimit, trajnimeve dhe stërvitjeve duke:
– Ndarë ekspertizën dhe praktikat më të mira në rekrutimin, zhvillimin dhe mbajtjen e personelit të kualifikuar, duke përfshirë shkëmbimin e koncepteve të forcave rezerviste, për të rritur kapacitetet tona parandaluese dhe mbrojtëse;
– Rritur mundësitë e edukimit dhe trajnimit individual dhe kolektiv përmes akademive dhe kolegjeve ushtarake përkatëse, me qëllim që të ketë kuptueshmëri më të mirë nga ana strategjike të kërcënimeve dhe sfidave të përbashkëta;
– Forcuar stërvitjet dypalëshe dhe/ose trepalëshe për të përmirësuar ndërveprueshmërinë, në përputhje me Politikat e NATO-s dhe BE-së për Trajnimet dhe Stërvitjet, për t’u siguruar që forcat të jenë të përgatitura në mënyrë adekuate.
3. Kundërpërgjigja ndaj kërcënimeve hibride dhe rritja e qëndrueshmërisë duke:
– Forcuar hapat e përbashkët për t’iu kundërpërgjigjur kërcënimeve hibride, duke përfshirë kërcënimet kibernetike, fushatat e dezinformimit, si dhe ndikimin dashakeq të huaj që mund të komprometojë ose të ndikojë në sigurinë kombëtare dhe rajonale;
– Shkëmbyer informacione dhe shërbime të inteligjencës për ndërgjegjësimin dhe koordinimin strategjik dhe operacional të situatës ndërmjet institucioneve të mbrojtjes për të parandaluar, zbuluar dhe reaguar në mënyrë efektive kundër sfidave që hasin vendet tona përkatëse;
– Eksploruar opsione të reagimit që adresojnë një gamë të gjerë kërcënimesh të mundshme për infrastrukturën tonë kritike dhe rrjetet e komunikimit dhe që mbështesin kohezionin dhe ndihmën e ndërsjellë.
4. Ofrimi i mbështetjes së plotë për integrimin euroatlantik duke:
– Përafruar politikat dhe pozicionet me institucionet dhe strukturat shumëpalëshe euroatlantike për sigurinë dhe mbrojtjen, për të çuar përpara interesat dhe objektivat tona kombëtare dhe të përbashkëta rajonale;
– Treguar angazhim për bashkëpunim dhe koordinim më të ngushtë për integrimin e plotë të Kosovës në iniciativat rajonale për sigurinë mbrojtjen;
– Mbështetur perspektivën euroatlantike të Kosovës duke ofruar mbështetje për statusin e saj në Partneritetin për Paqe të NATO-s.
Kjo Deklaratë e Përbashkët është bërë në frymën e miqësisë, solidaritetit dhe besimit të ndërsjellë. Ajo pasqyron vizionet e përbashkëta strategjike të Republikës së Shqipërisë, Republikës së Kroacisë dhe Republikës së Kosovës. Ajo nuk krijon asnjë detyrim të ri ligjor ndërkombëtar ose ndërqeveritar ndërmjet shteteve, as nuk ndikon në detyrimet ekzistuese me shtetet e tjera.
‘Albanian Post/Katror.info
