Dokumentari “Gratë në sektorin e sigurisë: ndërmjet sfidave dhe mundësive’’ është projekti më i ri i OJQ SHE Solutions, i mbështetur nga Rrjeti Mesdhetar i Grave Ndërmjetësuese (MWMN) i financuar dhe promovuar nga Ministria e Jashtme Italiane dhe Bashkëpunimi Ndërkombëtar.
Ky dokumentar është pjesë e angazhimit të SHE Solutions në promovimin e rëndësisë që ka përfshirja e grave dhe vajzave në sektorin e sigurisë, në dobi të promovimit të paqes dhe sigurisë së përgjithshme. Paraprakisht SHE Solutions ka realizuar një konferencë (viti 2021) dhe një hulumtim (vitit 2022) në të njëjtën temë ku janë diskutuar, analizuar dhe janë nxjerr rekomandime se cilat hapa duhet të ndërmerren për rritjen e numrit të grave dhe vajzave në këtë sektor.
Pavarësisht që institucionet e vendit kanë bërë përpjekje për përfshirje më të madhe të vajzave dhe grave në sektorin e sigurisë numri ende nuk është i kënaqshëm.
Në Policinë e Kosovës përfaqësimi i grave është 14.91%, sipas të dhënave zyrtare të dhjetorit të vitit 2021. Megjithatë, përfaqësimi i grave në pozita vendimmarrëse në polici lë për të dëshiruar, pasi që gratë nuk kanë arritur asnjëherë të kalojnë shifrën prej 10 %. Te Policia e Kosovës situata është pak më e ndjeshme, sepse ka një përqindje të largimit të grave nga sektori i sigurisë. Po ashtu, Ministria e Mbrojtjes ka përqindje shumë të ulët të grave në pozita vendimmarrëse. Diku prej 48 pozitave në Ministrinë e Mbrojtjes vetëm 7 prej tyre mbulohen nga gratë. Sa i përket FSK-së, aty ka rritje të dukshme krahasuar me vitet paraprake, përqindja e grave sillet diku rreth 11.9%, ku kemi grua në pozitën gjeneral brigade, po ashtu 4 gra janë në pozitën e koloneles, 5 gra majore dhe 6 gra kapitene. Në FSK rritja ka qenë graduale, por e qëndrueshme.
Kush është SHE Solutions dhe cilat janë objektivat e saj?
SHE Solutions synim parësor e ka fuqizimin e vajzave dhe grave në të gjitha fushat e jetës, me theks në vendimmarrje. Kjo duke pasur parasysh nevojën që kanë vajzat dhe gratë për mbështetje në marrëdhëniet me publikun, në komunikim dhe avokim për të çuar përpara çështjet me interes për to dhe për të bërë të mundur realizimin e objektivave që ato të jenë vlerë dhe jo vetëm numër, siç po perceptohen, në institucionet në të cilat ato punojnë, në shoqëri civile, media ose ndërmarrësi.
Objektivat e SHE Solutions janë:
- Fuqizimi, mbështetja dhe promovimi i grave në postet vendimmarrëse;
- Promovimi I grave në sektorin e sigurisë si ato në postet vendimmarrëse ashtu edhe ato brenda sektorit, që janë të përfshira në administratë, apo angazhim profesional në këtë sekor (Policia e Kosovës dhe Forca e Sigurisë së Kosovës);
- Fuqizimi dhe promovimi i punës së grave në politikë.
SHE Solutions, me veprimtarinë e vetë synon të krijojë mekanizma ku gruaja do të konsiderohet faktor kyç, çelës, për zgjidhjen e të gjitha ngërçeve në shoqërinë tonë.
SHE Solutions, personifikon rëndësinë që ka gruaja dhe vajzat, në zhvillimin e gjithmbarshëm të shoqërisë dhe me punën e saj synon të sjellë ndryshimin e perceptimit të asaj çfarë paraqet barazia gjinore, sepse mendojmë se pikërisht këtu fillon të ndodhë ndryshimi. /Katror.info
Përgatiti:
