Organizatat e shoqërisë civile në Kosovë kanë reaguar me shqetësim të thellë ndaj dështimit të vazhdueshëm për konstituimin e Kuvendit të Republikës së Kosovës, duke e cilësuar këtë situatë si një krizë të thellë institucionale që po rrezikon funksionimin demokratik të shtetit, shkruan Katror.info.
Në një deklaratë të përbashkët, organizatat theksojnë se bllokimi i Kuvendit pas zgjedhjeve të 9 shkurtit ka kaluar çdo kufi të tolerueshëm dhe po dëmton rëndë institucionet, përfshirë edhe qeverisjen, e cila po vazhdon pa mbikëqyrje parlamentare, gjë që konsiderohet e papranueshme për një vend demokratik.
“Refuzimi i partive politike për të bashkëpunuar dhe për të hyrë në dialog për gjetjen e një zgjidhjeje është i papërgjegjshëm dhe cenon funksionimin e shtetit të së drejtës,” thuhet në reagimin e shoqërisë civile.
Mundesh me e lexu edhe…
Sipas deklaratës, mosfunksionalizimi i Kuvendit po pamundëson miratimin e ligjeve dhe vendimeve kyçe për vendin, duke ndikuar negativisht në jetën e qytetarëve dhe duke rrezikuar stabilitetin institucional, zhvillimin ekonomik dhe besimin në përfaqësimin demokratik.
Organizatat civile gjithashtu paralajmërojnë për pasoja të rënda ekonomike, përfshirë vonesa dhe rrezikim të fondeve nga Plani i Rritjes i Bashkimit Evropian, në një kohë kur Kosova tashmë përballet me reduktim të ndjeshëm të mbështetjes financiare ndërkombëtare për shkak të masave ndëshkuese nga BE dhe pezullimit të fondeve nga Shtetet e Bashkuara të Amerikës.
“Mosfunksionalizimi i Kuvendit në këtë kontekst gjeopolitik është një veprim i papërgjegjshëm dhe dëmton imazhin e Kosovës si një shtet serioz në skenën ndërkombëtare,” vijon deklarata.
Shoqëria civile i bën thirrje udhëheqësve të partive parlamentare që të marrin përgjegjësinë që u është besuar dhe të veprojnë menjëherë për tejkalimin e krizës politike, duke vënë interesin publik mbi kalkulimet politike.
“Mungesa e vullnetit për bashkëpunim është e papranueshme. Mosveprimi nuk është opsion,” përfundon deklarata, duke theksuar gatishmërinë e shoqërisë civile për të kontribuar në zgjidhjen e krizës dhe rikthimin e funksionalitetit demokratik në vend.
Situata në Kuvendin e Kosovës mbetet e tensionuar, ndërsa presioni nga brenda dhe jashtë vendit për zhbllokimin e krizës politike po rritet çdo ditë./Katror.info
