Sot pritet të hapet Pishina e Gërmisë në Prishtinë. Kështu kanë bërë të ditur drejtues të ndërmarrjes “Sport Marketing” , sipas të cilëve, edhe sivjet, çmimet do të jenë të njëjta. Bëhet e ditur se këtë vit, është shtuar numri i shtretërve dhe kabinave për qytetarët.
Përgjegjës të Pishinës së Gërmisë në Prishtinë, kanë bërë të ditur se janë bërë të gjitha përgatitjet që nesër të hapet sezoni për përdorim të pishinës.
Kryeshefi ekzekutiv i Ndërmarrjes “Sport Marketing”, Bardh Krasniqi, i tha Radio Kosovës së hapja e sezonit këtë vit erdhi me disa javë vonesë, si pasojë e mungesës së ujit në burimet natyrore të Gërmisë.
Mundesh me e lexu edhe…
“Përgatitje janë bërë, besoj që nesër do të startojmë. Po startojmë pak me vonesë por se nuk është diçka që është varur nga ne. Faktikisht ne kemi qenë të gatshëm ta hapim që para katër javësh, prej që ka filluar mbushja e pishinës. Kjo situatë ka ardhur si pasojë e thatësirës dhe mungesës së ujit pasi e dimë që pishina mbushet prej burimeve natyrore, maleve të Gërmisë. Kemi pasur vështirësi që këtë vit ta mbushim për atë kohë që e planifikojmë bazuar në vitet e kaluara”, tha Krasniqi.
Tutje, Krasniqi foli edhe për çmimet, për të cilat tha se janë të njëjta me vitet e kaluara. Ai shtoi se risi këtë vit është rritja e kapaciteteve të shtretërve dhe kabinave.
“Çmimet janë të njëjta si në tri vitet e kaluara. Pra, çmimet janë 4 euro për të rritur dhe 2 euro për fëmijë dhe kështu do të vazhdojnë të jenë në gjithë sezonin. I kemi rritur kapacitetet e akomodimit. I kemi dikur edhe 150 shtretër më shumë dhe 30 kabina shtesë për qytetarët. Kështu që besoj që kapaciteti është i mjaftueshëm për kërkesën që e kemi pasur për 500 deri në 550 qytetarë”, shtoi ai.
Viteve të kaluara pishina e Gërmisë ka pasur numër të madh të vizitorëve gjatë stinës së verës. Pishina e Gërmisë do të jetë e hapur çdo ditë për vizitorët nga ora 10:00 deri në orën 18:00./Katror.info
