Një ditë e jashtëzakonshme ka ndriçuar qytetin e Mitrovicës Veriore sot, ku 14 fëmijë nga komunitete të ndryshme kanë veshur uniformat e Policisë së Kosovës dhe kanë marrë pjesë në projektin inovativ “Sot Unë Polic i Kosovës.” Ky projekt, i iniciuar nga Drejtoria e Policisë në Bashkësi dhe Parandalim, synon të afrojë fëmijët me zyrtarët policorë dhe të ndërtojë një ndjenjë bashkëpunimi dhe mirëbesimi në komunitet.
Në një hapësirë të sigurt brenda qytetit, fëmijët e veshur si policë, së bashku me zyrtarët e Policisë së Kosovës, krijuan një pikë kontrolli të veçantë. Gjatë këtij aktiviteti, ata ndaluan automjetet, verifikuan dokumentet e vozitësve dhe i këshilluan për sigurinë në trafik dhe masat e përgjithshme të sigurisë. Kjo eksperiencë u dha fëmijëve një shije të jetës si polic dhe një kuptim më të thellë të rëndësisë së ruajtjes së rendit dhe sigurisë publike.
Në kuadër të aktivitetit, u shpërndanë fletushka vetëdijësuese mbi dukuritë negative dhe sigurinë në trafik, si dhe materiale për ngjyrosje të dizajnuara për fëmijët me animacione të ndryshme. Ky projekt mblodhi fëmijë nga të gjitha komunitetet, përfshirë 8 serbë, 4 shqiptarë dhe 2 romë, duke promovuar bashkëjetesën dhe diversitetin kulturor.
Në fund të ditës, secili nga pjesëmarrësit mori një paketë të veçantë me rekuizita të Policisë së Kosovës si një shenjë falënderimi dhe kujtimi për këtë përvojë të paharrueshme.
Policia e Kosovës ka njoftuar se ky projekt do të vazhdojë edhe në qendrat e tjera të Kosovës, duke ofruar mundësi të ngjashme për fëmijët e të gjitha rajoneve që të përfshihen dhe të mësojnë për rolin e rëndësishëm që luan policia në mbrojtjen e komunitetit./Katror.info
