Treshja në përbërje të sopranos gjeorgjiane, Nino Machaidze, tenorit nga Kosova Rame Lahaj, dhe basit italian, Dario Russo, kanë sjellur para publikut arie të operave botërore në sheshin “Skënderbeu” në Prishtinë.
Me prapavijën që zhvendoset në pallate, kopshte e u shkon për shtati arieve dramatike, solistët nën përcjelljen e Orkestrës Simfonike të Radiotelevizionit të Shqipërisë po e shpien publikun në histori të vjetra nëpërmjet artit operistik.
Nën dirigjimin e Roberto Rizzi Brignolit, gala-mbrëmja “Ramë Lahaj & Friends” në kuadër të natës përmbyllëse të Festivalit Ndërkombëtar të Operës “Rame Lahaj” ka mbushur sheshin qendror të Prishtinës, shkruan Koha.net.
Mundesh me e lexu edhe…
Një nga momentet më të veçanta të koncertit “Rame Lahaj & Friends” ishte surpriza nga Posta e Kosovës, e cila nderoi tenorin tonë të madh me një pullë postare me portretin e tij, si shenjë mirënjohjeje për kontributin në promovimin e kulturës dhe imazhit të Kosovës në botë.
I emocionuar, Rame Lahaj tha se ndihet i privilegjuar dhe i inspiruar duke e konsideruar një moment të veçantë motivimi. Ai theksoi se përpjekjet e tij ndër vite kanë qenë të përqendruara në promovimin e imazhit të Kosovës përmes muzikës.
“Ndjej privilegj, janë këto momente që realisht më frymëzojnë, më inspirojnë, më japin përgjegjësi për të bërë atë që kam provuar të bëj viteve fundit, duke menduar që po kontribuoj të promovojë imazhin e Kosovës duke sjellë këngën shqipe nëpër katër kontinente e globin në botë pesë vjetët e fundit. Është moment inspirimi sepse unë sapo kam ardhur nga sezoni i fundit operistik…”, tha Lahaj.
Ndërkaq, nga Posta e Kosovës, Fakete Kadiu u shpreh se ishte një kënaqësi e veçantë të prezantojë edicionin më të ri të pullave postarej. Kadiu tha se me përkushtim e pasion, Lahaj arriti që kënga shqipe të dëgjohet në mbarë botën.
“Është kënaqësi e veçantë që sot para juve të prezantoj edicionin më të ri të pullave postare të Postës së Kosovës i dedikohet tenorit tonë të mirënjohur, Rame Lahaj. Me përkushtimin plot pasion, Rama arriti që kënga e bukur shqipe të dëgjohet në të gjitha sallat e operës në botë”, tha Kadiu, raporton KosovaPress.
Ndërkaq, në kuadër të koncertit, foli edhe ish-kapiteni i kombëtares shqiptare të futbollit Lorik Cana, derisa vlerësuar iniciativën e Lahajt dhe rëndësinë e artit në formimin e identitetit dhe kulturës kombëtare.
E kënga “Moj e bukura more” u interpretua nga Angela Dell Aquila./Katror.info
