Prishtina ka nisur një kapitull të ri në menaxhimin e emergjencave me themelimin e Shoqatës së parë Vullnetare për Zjarrfikje dhe Shpëtim në Kosovë.
Kjo nismë, e themeluar në mars të këtij viti, ka marrë hov gjatë gushtit me hapjen e thirrjes për vullnetarë, – shkruan Katror.info.
Deri tani, 23 qytetarë i janë bashkuar kësaj kauze.
Mundesh me e lexu edhe…
Bajram Rexhepi, kryetar i Shoqatës, ndan me neve detaje rreth funksionimit të saj.
“E kemi formu Kuvendin, Bordin, Kryetarin e Shoqatës, nënkryetarin, kemi komandantin dhe zëvendëskomandantin. Tani kemi fillu me regjistrimin e zjarrfikësve vullnetarë të rinj. Duke pa numrin e madh të zjarreve, të vatrës së zjarreve që po krijohen, fatkeqësisht shumica e tyre të qëllimshme, zjarre të qëllimshme, mbi 2600 intervenime kanë pasur në Brigadën e Zjarrfikësve Profesionistë” – u shpreh kryetari.
“Ka prej të gjitha moshave, kemi edhe të vjetër i kemi dy-tre që janë lajmëruar, por vullnetin e kanë shumë të mirë, domethënë zemër të madhe, vullnet të mirë, që ata dojnë me me i ndihmu komunitetit të vet. Kryesisht janë ma të rinj, edhe realisht neve na duhen të gjithë, pavarësisht moshave edhe gjinive, kemi edhe femra që janë lajmëru si vullnetare. Numri është i vogël dy tri, po shpresoj se në të ardhmen do të rritet numri” – thekson ai.
Shoqata synon të shtojë kapacitetet për reagim të shpejtë ndaj zjarreve dhe fatkeqësive natyrore, duke mbështetur punën e zjarrfikësve profesionistë dhe duke rritur sigurinë në kryeqytet.
“Çdo kandidat që vjen me u regjistru, domethanë fillimisht i lexon kriteret, duhet të mos jetë nën hetime, duhet të ketë certifikatën e shëndetësisë, edhe nuk janë kritere ku me ditë çfare ashtu që s’mundet m’i plotësu çdokush. Trajnimin patjetër duhet me pasë, se zjarri nuk i njeh cilët janë zjarrfikës profesionistë apo vullnetarë. Zjarrit duhet t’i qasen njëjtë si vullnetarët si profesionistët dhe duhen të jenë të përgatitur shumë mirë edhe na shpresojmë se përmes Agjencionit për Menaxhimin e Emergjencave në Akademinë në Vushtrri do të kryejmë trajnimin e të gjithëve” – tha z.Rexhepi.
“Sipas Rregullores që e kemi, Status Rregullores, çdo orë e vullnetarit paguhet njëjtë si ora e profesionistëve. Vetëm se domethënë ata nuk janë të rregullt në punë, po atëherë kur intervenojnë, në cilën komunë intervenojnë, ajo komunë është përgjegjëse për pagesën e tyre. Disa prej tyre, kur ia kemi tregu këto kushte, nuk kanë qenë të interesum për pagesa. s’kemi ardhur për pagesa, kemi ardhur në bazë të vullnetit të mirë për me punu me dëshirë” – tregon ai.
Rol vendimtar në themelimin e Shoqatës Vullnetare për Zjarrfikje dhe Shpëtim, ka luajtur Drejtoria për Siguri dhe Emergjenca në Prishtinë, një nismë e parashikuar edhe në Ligjin për Zjarrfikje dhe Shpëtim.
“Kemi fillu hapat e parë e krijimit të krijimit të shoqatës, si nevojë e ngritjes së kapaciteteve të sigurisë sigurisë publike dhe ngritjes së kapaciteteve emergjente në kryeqytet, marrë parasysh dy faktorë: një, numrin e vogël të zjarrfikësve që ka kryeqyteti, edhe pse tashmë me rritjen e tyre e kemi një numër optimal, po prapë ka nevojë më shumë dhe dy: rritjes së madhe të kryeqytetit në të gjitha pjesët e saj dhe pamundësisë së reagimit në kohë reale dhe në kohë të duhur për intervenime jo vetëm të zjarrfikës, po edhe të fatkeqësive tjera natyrore, ndryshimeve, tërmeteve” -u shpreh Lulzim Fushtica, drejtor për Siguri dhe Emergjenca në Prishtinë.
Drejtori vlerësoi se Shoqata e Vullnetarëve për Zjarrfikje dhe Shpëtim të Kryeqytetit përfaqëson një shembull të qartë të përkushtimit qytetar dhe solidaritetit ndaj komunitetit.
“Njësia e parë do të jetë për zjarrfikje dhe shpëtim, njësia e dytë do të jetë njësia për kërkim shpëtim malor dhe njësia e tretë do të jetë njësia e zhytjes së kërkimit dhe shpëtimit në ujë. Pra, këto tri njësi, shpresojmë, varet nga numri i qytetarëve që do të paraqiten dhe do t’i pozicionojmë në pikat kyçe, pra jo vetëm në qytet, po edhe në fshatrat e kryeqytetit, në mënyrë që aty të kemi qasje më të lehtë dhe intervenim më të shpejtë” – spjegon z.Fushtica.
Regjistrimet për t’u bërë pjesë e kësaj nisme mbeten të hapura pranë Brigadës së Zjarrfikësve në Prishtinë për të gjithë qytetarët e interesuar./Katror.info
Edicionin #84 të plotë e gjeni KËTU 🙂
