Nga kjo gjendje e mjerushme, në një pamje mbreslënëse kaloi Liqeni i Badovcit në vetëm dy orë.
Një numër qytetarësh vullnetarë iu bashkuan thirrjes së Klubit “Pylli i Arinjve” për pastrimin e Liqenit të Badovcit, i cili furnizon banorët e Prishtinës me ujë të pijshëm.
Përveç pastrimit, qëllim i këtij aksioni ishte edhe ngritja e vetëdijes së qytetarëve për ruajtjen e ambientit dhe mos hedhja e mbeturinave.
Albana Hoti e cila tash e 10 vite është pjesë e “Pyllit të Arinjve”, tregon se një iniciativë e tillë ishte e domosdoshme, marrë parasysh rëndësinë e liqenit dhe frekuentimit të madh nga qytetarët edhe nga vetë ata si organizatë.
“Ne çdo ditë udhëtojmë për te Pylli i Arinjve dhe është e ndjen shumë e keqe me e pa këtë liqen kaq të bukur, që është shumë aset për neve, për Prishtinën, edhe kur e sheh me atë sasi të mbeturinave, qysh edhe ju sot jeni t’u e pa që jemi duke i largu. Kështu që ideja ka ardhë nga vetë fakti që ne e kemi pa sa keq është gjendja e liqeni edhe kemi marrë iniciativën me organizu që sot me bo pastrimin. Edhe sigurisht që kjo është tu ndodh sot me bashkëpunëtorë të shumtë, është edhe Rotary Club Ulpiana Prishtina, mandej Guida KS, është edhe kompania e pastrimit që është përgjigj. Ata domethënë janë duke na ndihmu me i marrë mbeturinat, me i grumbullu dhe me i largu prej vendit… ka edhe shumë individë tjerë shoqërisë civile që janë ardhë dhe kanë dalë me ndihmu në këtë aksion”, thotë Albana.
E për këtë Albana ka një mesazh që do të duhej të trokiste në ndërgjegjen e qytetarëve, të cilët këtë pjesë e shfrytëzojnë për të kaluar kohë të mirë, por nuk kujdesen se si e po e lënë atë.
“Mesazhi ynë kish me qenë: Ruajeni mjedisin sa më shumë që është e mundur. Nëse ne marrim gjësende për me ngrënë, duke e shiju një pamje kaq të bukur, atëherë pse mos t’i marrim mbeturinat që ne i grumbullojmë në atë ditë kur e kalojmë? Liqeni i Badovcit shfrytëzohet shumë si pjesë, po them, turistike për një pjesë të madhe të qytetarëve për me ardhë me kalu ditën dhe janë vetë ata qytetarët të cilët e sjellin këtë gjendje. Unë nuk e di se si munden me ardhë herën e dytë pas asaj sasie të mbeturinave që e lojnë edhe mu ulë prapë pa i pengu aspak”, shtoi ajo.
Ndërsa Vigan Rugova nga Klubi Rotary Prishtina – Ulpiana, thotë se solidariteti, dashuria ndaj vendit dhe aktivitete të tilla vullnetare janë detyrë e secilit prej nesh.
“Ne jemi rotarianë dhe kemi marrë ftesë prej organizatorit të klubit të Pyllit të Arinjve për me ju bashkëngjit këtë javë aksionit dhe na u duk që është një aksion shumë i qëlluar me pastru Liqenin e Badovcit dhe me i kontribu komunitetit, të cilin e kemi mision si klub. Sigurisht që kjo është detyrë e secilit. E para, mos me hedhë mbeturina, e dyta, me ju bashkëngjitë këtyre aksioneve është me tregu solidaritet dhe dashni ndaj vendit, që me e mbajtë ambientin e pastër” u shpreh Vigani.
Ndërsa për t’ua mësuar kulturën e pastërtisë dhe aktivizmit qytetar, Vigani i kishte marrë edhe fëmijët në këtë aksion.
“I mora edhe fëmijët, bile kanë ardhë me shumë entuziazëm, gëzueshëm janë prej javës së kalume që kemi me dalë bashkë me pastru. Kjo fillon prej moshës së vogël edhe mandej futet në kulturë që mos me ndotë ambientin”, tha ai.
Toka është ajo që ne të gjithë e kemi të përbashkët, andaj aksione si këto duhet të konsiderohen po ashtu të përbashkëta, e nësaj nisme iu bashkua edhe i huaji Jahan Dabur, që jeton tash e disa vite në Kosovë dhe që frekuenton këtë pjesë çdo vikend.
“Jetoj qe 15 vjet në Kosovë dhe çdo të shtunë vi këtu për të bërë ‘hiking’ me qenin tim, dhe kur erdha këtu pas dimrit, u trondita, kjo pjesë ishte aq e ndotur. Unë nuk shoh asnjë kosh plehrash këtu, kështu që njerëzit ndoshta nuk mund t’i hedhin mbeturinat në kontenjer, e kuptoj që i lënë këtu, por ky është uji që ne pimë, kështu që mendoj se është mirë që e pastruam sot, sepse tash e tutje do të vij këtu çdo javë”, u shpreh ai.
E nga mungesa e koshit të mbeturinave që vërejti, ai mendon të bëjë diçka të përhershme lidhur me këtë në mënyrë që t’i jap zgjidhje hudhjes së mbeturinave në ambient të hapur.
“Mendoj se është një iniciativë e shkëlqyer. Unë jam këtu së bashku me disa njerëz nga Organizata Rotary, dhe le të shohim nëse mund të bëjmë diçka të përhershme këtu, ndoshta me kontenjerët apo diçka tjetër. Do t’i bëjë thirrje kryetarit (të komunës) për të vendosur kosh plehrash këtu, sepse ky është një vend kaq i bukur, është mahnitës. Kosova është e bukur, është tepër e bukur, le ta mbajmë kështu. Malet, luginat, fushat dhe njerëzit sigurisht, kështu që ta mbajmë të bukur, ia vlen”, shtoi tutje ai.
Siç pati thënë edhe inxhinieri amerikan Bill Nye: “Për ta lënë botën më mirë se sa e gjejmë, ndonjëherë duhet të mbledhim mbeturinat e njerëzve të tjerë”, prandaj edhe Albana i bën thirrje të gjithëve, që jo vetëm Badovcin, por të kujdesemi e ta pastrojmë gjithë Kosovën.
“Unë i kisha lut shumë dhe i kisha bo thirrje gjithë qytetarëve të cilët kanë mundësi me u bashkëngjitë këto aksione. Është diçka shumë humane, është diçka që i shërben shëndetit tonë, natyrës tonë dhe është diçka që nuk duhet me hezitu asnjani prej neve për me u bashkëngjitë në iniciativa të tilla. Kështu që Hajdeni ta pastrojmë bashkë Kosovën, jo vetëm liqenin e Badovcit”, përfundoi ajo.
Kosova në të vërtetë ka vende të bukura gjithandej. Gjithçka duhet bërë është krijimi i një sinergjie mes qytetarëve dhe insitutcioneve lokale që vendet turistike, dhe jo vetëm, të ruhen e mirëmbahen në mënyrë të vazhdueshme.
E juve krejt cka ju mbetet tash kur moti ka filluar të ngrohet, është të dilni dhe shijoni bukurin e Liqenit të Badovcit, dhe ta lini atë më pastër sesa që e gjeni. /Katror.info
Edicionin #41 të plotë e gjeni KËTU 🙂