Studimi i ri ka zbuluar se ekspozimi ndaj rrezeve me dritë të kuqe të gjatë mund të ulë rrezikun e mpiksjes së gjakut, gjë që mund të shkaktojnë sulme në zemër, dëmtim të mushkërive dhe goditje në tru.
Terapia me dritë të kuqe (RLT) është një lloj trajtimi që përdorë gjatësi të ulëta të valëve të dritës së kuqe për të trajtuar disa probleme në lëkurë, shkruan KOHA.
Gjetjet e hulumtimit, të udhëhequr nga shkencëtarët dhe kirurgët e Shkollës së Mjekësisë në Universitetin e Pittsburgh dhe UPMC, dhe i cili është publikuar në Journal of Thrombosis and Haemostasis, thuhet se, duhet verifikuar përmes provave klinike. Por theksohet se ato mund të ndihmojnë në uljen e mpiksjeve të gjakut në vena dhe arterie, të cilat janë shkaqet kryesore të vdekjeve të parandalueshme në mbarë botën raporton MedicalExpress.
Mundesh me e lexu edhe...
“Një nga efektet e dritës ndaj së cilës ne ekspozohemi mund të ndryshojë proceset tona biologjike dhe të ndikojë në shëndetin tonë. Gjetjet tona mund të çojnë në një terapi relativisht të lirë nga e cila do të përfitojnë miliona njerëz”, ka thënë autorja kryesore e studimit, Elizabeth Andraska, profesoreshë e kirurgjisë në Qendrën e Hulumtimit të Mjekësisë së Traumës dhe Transfuzionit në Pitt dhe rezidente e kirurgjisë vaskulare në UPMC.
Shkencëtarët e dinë se ekspozimi ndaj dritës lidhet me shëndetin. Lindja dhe perëndimi i diellit ndikojnë në metabolizëm, sekrecionin e hormoneve, madje edhe në qarkullimin e gjakut, dhe sulmet në zemër e goditjet në tru janë më të shpeshta gjatë orëve të mëngjesit sesa gjatë natës. Andraska dhe kolegët e saj u munduan të kuptonin nëse drita mund të kishte ndikim në mpiksjet e gjakut që shkaktojnë këto kushte.
Për të testuar këtë ide, ekipi ekspozoi minjtë në dritë të kuqe për 12 orë, të kaltër ose të bardhë, pasuar nga 12 orë errësirë, në një cikël 72-orësh. Ata më pas vëzhguan ndryshimet në mpiksjet e gjakut midis grupeve. Minjtë që ishin ekspozuar ndaj dritës së kuqe kishin gati pesë herë më pak mpiksje sesa ata që ishin ekspozuar ndaj dritës blu ose të bardhë. Aktiviteti, gjumi, të ngrënit, pesha dhe temperatura e trupit mbetën të njëjta ndërmjet grupeve.
Grupi gjithashtu analizoi të dhëna ekzistuese për më shumë se 10,000 pacientë që kishin kryer kirurgji të kataraktit dhe kishin marrë lente konvencionale që transmetojnë të gjithë spektrin e dukshëm të dritës, ose lente që filtrojnë dritën e kaltër, të cilat transmetojnë rreth 50% më pak dritë blu. Ata zbuluan se pacientët me kancer që kishin marrë lente që filtrojnë dritën blu kishin rrezik më të ulët të mpiksjeve të gjakut krahasuar me ata që kishin lente konvencionale.
Ky është një rezultat veçanërisht interesant sepse pacientët me kancer kanë rrezik nëntë herë më të madh të mpiksjeve të gjakut sesa ata pa kancer.
“Rezultatet tona po zgjidhin një mister të mrekullueshëm se si drita ndaj të cilës ekspozohemi çdo ditë ndikon në reagimin e trupit tonë ndaj dëmtimeve. Hapat tanë të ardhshëm janë të kuptojmë pse, biologjikisht, kjo po ndodh dhe të testojmë nëse ekspozimi më i shpeshtë i njerëzve, që rrezikohen më shumë nga mpiksja e gjakut, ndaj dritës së kuqe e ul atë rrezik. Duke zbuluar këtë mund të kontribuojmë në uljen drastike të numrit të vdekjeve dhe paaftësive që shkaktohen nga mpiksjet e gjakut në mbarë botën”, ka thënë një nga autorët e studimit, Matthew Neal.
Studimi tregon se rruga optike është çelësi, drita nuk kishte asnjë ndikim te miu i verbër, dhe drita e drejtuar drejtpërdrejt ndaj gjakut nuk shkaktoi ndryshime në mpiksje.
Grupi i studiuesve gjithashtu ka vënë re se ekspozimi ndaj dritës së kuqe është i lidhur me më pak inflamacion dhe aktivizim të sistemit imunitar. Për shembull, minjë që ishin ekspozuar ndaj dritës së kuqe kishin më pak “rrjeta ekstracelulare neutrofilesh” (NETs), të cilat janë struktura në formë rrjete të krijuara nga qelizat imune për të kapur mikroorganizmat e infektuar, dhe gjithashtu ato kapin trombocitet, të cilat mund të çojnë në mpiksje.
Minjtë e ekspozuar ndaj dritës së kuqe gjithashtu kishin prodhim të shtuar të acidit yndyror, i cili redukton aktivizimin e trombociteve. Duke qenë se trombocitet janë të nevojshme për formimin e mpiksjeve, kjo natyrshëm çon në më pak formim të mpiksjeve.
Kuptimi i mënyrës se si drita e kuqe po shkakton ndryshime që ulin rrezikun e mpiksjes mund t’i ndihmojë shkencëtarët të gjejnë medikamente ose terapi më të fuqishme dhe më të përshtatshme për pacientët se ekspozimi i vazhdueshëm ndaj dritës së kuqe.
Në përgatitje për provat klinike, studiuesit po zhvillojnë syze me dritë të kuqe për të kontrolluar sasinë e dritës së kuqe ndaj së cilës ekspozohen pjesëmarrësit gjatë studimit dhe po hetojnë se kush mund të përfitojë më shumë nga drita e kuqe./Katror.info
Përgatiti:
