Në një konferencë për shtyp pas triumfit ndaj Monacos, trajneri i Lille, Bruno Genesio, ka folur për të ardhmen e Edon Zhegrovës.
E ardhmja e sulmuesit kosovar ka qenë një temë mjaft e diskutuar gjatë këtij afati kalimtar veror, mes pasigurisë për vazhdimësinë e tij tek Lille apo largimit në drejtim të ndonjë klubi tjetër, përcjell Telegrafi.
Interesim konkret për sulmuesin dardan kishte shprehur Juventusi, të cilët ishin të gatshëm ta afrojnë në radhët e tyre 26-vjeçari.
Mundesh me e lexu edhe…
Sidoqoftë, presidenti i Lille, Olivier Letang, kishte konfirmuar se asnjë marrëveshje nuk është arritur me ‘Zonjën e Vjetër’ dhe se ai personalisht pret që Zhegrova të mbetet pjesë e tyre, të paktën edhe këtë sezon.
Të njëjtin mendim nuk e ka edhe Genesio, i cili në një deklaratë pas ndeshjes tha se nuk është shumë i sigurt për të ardhmen e Zhegrovës.
“Ai është këtu, me ne. Do të shohim nëse do të jetë këtu deri në fund. Edoni ka nevojë për kohë, nuk ka luajtur për një kohë shumë të gjatë”.
“Ai pati një lodhje të lehtë muskulore e cila u aktivizua para ndeshjes”, ka thënë Genesio.
Javën e ardhshme Lille do të luajë në udhëtim ndaj Lorient dhe mbetet të shihet nëse Zhegrova do të marrë disa minuta. /Katror.info
