Në Pallatin e Rinisë, ku zhvillon veprimtarinë Teatri Kombëtar i Kosovës, është hapur edicioni i dytë i Festivalit Ndërkombëtar të Filmit Studentor „UPward”, që organizohet në kuadër të Universitetit Ndërkombëtar Veror të Prishtinës, shkruan Katror.info.
Dekani i Fakultetit të Arteve, prof. Hazir Haziri, shpalli festivalin të hapur, duke e përshkruar atë si një platformë të rëndësishme për shkëmbimin e njohurive ndërstudentore. Në fjalën e saj, prorektorja për ndërkombëtarizim dhe shkëmbim akademik, prof. Rozafa Basha, theksoi se Universiteti Ndërkombëtar Veror i Prishtinës nuk është vetëm një qendër për shkëmbime akademike, por edhe një urë lidhëse mes kulturave dhe miqësive afatgjata — frymë kjo që reflektohet qartë në vetë Festivalin „UPward”.
Mes të ftuarve të shumtë ishin Ambasadori i Shqipërisë në Kosovë, Shkëlqesia e Tij Petrit Malaj; rektori i Universitetit të Arteve në Tiranë, prof. Erald Bakalli; drejtoresha e Qendrës Kosovare të Kinematografisë, Blerta Zeqiri; si dhe studentë e pedagogë vendorë dhe të huaj.
Mundesh me e lexu edhe…
Pas ceremonisë së hapjes u shfaq premierë filmi i Fationa Miftarit me titullin „Ku e ki shpinë.”
Festivali, që do të zgjasë katër ditë, organizohet nga Fakulteti i Arteve i Universitetit të Prishtinës dhe përfshin shfaqje filmash të shkurtër, punëtori dhe diskutime me pjesëmarrjen e profesorëve dhe studentëve vendorë e ndërkombëtarë./Katror.info.
