Venediku pritet të vendosë tarifën ditore prej pesë euro për vizitorët

Një nga pikat turistike më të vizituara në botë, Venecia (Venediku) e Italisë ka të ngjarë të miratojë një tarifë provuese prej pesë eurosh ditore për vizitorët në një përpjekje për të kontrolluar turizmin.

Të gjithë vizitorët mbi 14 vjeç do të duhet të paguajnë një tarifë paraprakisht dhe të rezervojnë hyrjen në qytet.

Këshilltarja e qytetit për turizmin, Simone Venturini, thotë se taksa testuese do të vendoset gjatë sezonit turistik të vitit të ardhshëm.

“Venecia është ndër qytetet evropiane më të vizituara… [dhe për këtë arsye] vuan më shumë nga mbiturizmi,” tha ai.

Numri i madh i turistëve është një nga problemet më të mëdha të Venecias.

Qyteti me vetëm 7.6 kilometra katrorë priti pothuajse 13 milionë turistë në vitin 2019, sipas të dhënave nga Instituti Kombëtar Italian i Statistikave.

Numri i vizitorëve pritet të tejkalojë nivelet e para Covid-19 në vitet e ardhshme.

“Qëllimi është që ata që vijnë për një ditë të zgjedhin të vizitojnë Venecian jashtë sezonit të pikut”, tha Venturini.

“Ne duam të testojmë taksën dhe, nëse është e nevojshme, ta përmirësojmë atë. Nuk mund të kalojmë 40 vjet të tjera duke debatuar se cila është gjëja më e mirë për të bërë.”

Në fillim të këtij viti, UNESCO, agjencia e Kombeve të Bashkuara për mbrojtjen e trashëgimisë kulturore, njoftoi se qyteti duhet të shtohet në listën e vendeve të trashëgimisë botërore të rrezikuara, pasi ndikimi i ndryshimeve klimatike dhe turizmit masiv kërcënojnë të shkaktojnë ndryshime të pakthyeshme.

Në vitin 2021, autoritetet e qytetit ndaluan anijet e mëdha të lundrimit të hynin në qendrën historike të Venecias përmes kanalit Giudecca pasi një anije u përplas në port.

Kritikët argumentojnë se anijet shkaktojnë ndotje dhe gërryejnë themelet e qytetit, i cili goditet rregullisht nga përmbytjet.

Megjithatë, nuk është e qartë nëse plani për të vendosur një tarifë ditore do të pengojë turistët.

Karina nga Gjermania tha se nuk do ta kishte problem të paguante taksën.

“Jemi me pushime, pesë euro nuk janë shumë”, thotë ajo.

Vizitorë të tjerë pajtohen se diçka duhet bërë.

“Është padyshim e mbushur me njerëz,” tha Cal, një student nga Irlanda.

“Shkuam në sheshin kryesor dhe kishim planifikuar të shkonim në kishën e Shën Markut, por radha ishte shumë e gjatë.

“Por unë mendoj se pesë euro janë mjaft për një shëtitje një ditë nëpër qytet.”

Gjithnjë e më shumë banorë të Venecias po largohen, pasi turistët kërcënojnë të pushtojnë qytetin historik.

Valentina Rizzi, një studente doktorature në një universitet lokal, ka jetuar në Venecia për pesë vjet.

Ajo luftoi për të gjetur një vend më të përhershëm për të jetuar, dhe përfundimisht gjeti një pronar që ishte i gatshëm t’i jepte një qira afatgjatë.

Të tjerët, megjithatë, nuk ishin aq me fat.

“Unë njoh studentë që duhej të linin akomodimin e tyre në maj ose qershor sepse pronari i tyre donte t’u jepte me qira shtëpinë turistëve për verën dhe ata mund të ktheheshin në tetor,” tha ajo.

Shoqatat e qytetarëve të Oćio dhe Venisa nisën studime për të monitoruar numrin e shtretërve për turistët dhe numrin e shtretërve për banorët e qytetit.

Sipas të dhënave të fundit, ndërkohë që janë 49.693 shtretër për turistët, 49.308 janë në dispozicion për banorët, që do të thotë se numri i shtretërve për turistët e kalon numrin e shtretërve për banorët.

Maria Fiano, mësuesja që drejton Ocio, tha se ishte e befasuar nga të dhënat.

“Në vetëm pesë muaj, numri i shtretërve për turistët u rrit me 1000 njësi,” shpjegoi ajo.

Ajo thotë se shumë ndërtesa ish-qeveritare, si Oda e Tregtisë, tani janë shndërruar në hotele.

“Është një situatë dramatike, sepse shënon shndërrimin nga qytet në joqytet, i banuar nga vizitorë të përkohshëm”.

Fiano beson se mënyra për të zgjidhur këtë problem është kufizimi i akomodimit për turistët.

Ajo nuk është e bindur se tarifa ditore do të sjellë rezultate.

“Mendoj se thjesht po ju hedh pluhur në sy”, tha ajo./Katror.info