Podujevë po shënon një hap të rëndësishëm në përmirësimin e kushteve të banimit me vënien e gurthemelit për ndërtimin e një objekti të ri banimi të përballueshëm.
Kryeministri në detyrë, Albin Kurti, theksoi se Qeveria po ofron më shumë se sa kërkojnë komunat, duke shtuar se projekti tashmë është duke filluar në Podujevë.
Në kuadër të këtij projekti, do të ndërtohen dy objekte me gjithsej 133 njësi banimi, prej të cilave 106 do të jenë për banim të përballueshëm dhe 27 për banim social. Kurti theksoi se kjo dëshmon për përkushtimin e Qeverisë për të ofruar më shumë mundësi banimi për qytetarët. “Po dëshmojmë se oferta jonë është më e madhe se kërkesat e komunave. Nga tri komuna, vetëm Podujeva ka aplikuar dhe po e realizon këtë projekt,” tha ai.
Mundesh me e lexu edhe…
Zëvendësministri i Mjedisit, Jeton Raka, bëri të ditur se vetëm 13 nga 38 komunat kanë aplikuar për këtë program, duke e cilësuar mungesën e interesimit si një shenjë të papërgjegjësisë nga disa udhëheqës komunale. “Në mesin e komunave të zgjedhura janë Istogu, Podujeva, Gjilani dhe Peja. Është e dhimbshme që shumica e komunave nuk kanë shfrytëzuar këtë mundësi, duke mohuar të drejta themelore siç është e drejta e banimit,” tha Raka.
Ky hap është konsideruar si një mundësi e rëndësishme për përmirësimin e kushteve të banimit për qytetarët e Podujevës dhe rajonit, ndërsa shpresohet që të rritet edhe interesimi për pjesëmarrje në projekte të tilla në të ardhmen./Katror.info
