Nesër, duke filluar nga ora 20:00, publiku artdashës do të ketë mundësinë të përjetojë një mbrëmje të jashtëzakonshme muzikore në kuadër të festivalit “Chopin Piano Fest”, shkruan Katror.info.
Në skenën e këtij festivali do të ngjiten dy emra të shquar të muzikës klasike botërore: Vovka Ashkenazy dhe Luca Rasca, të cilët do të paraqiten me një koncert recital në formatin e duetit pianistik.
Vovka Ashkenazy ka ndërtuar një karrierë të pasur ndërkombëtare si solist, muzikant kamertal dhe pedagog i përkushtuar. Që nga debutimi i tij në vitin 1983 në Barbican Centre me Orkestrën Simfonike të Londrës, Ashkenazy ka performuar në sallat më prestigjioze të botës si Hollywood Bowl, Royal Festival Hall dhe Opera e Sidneit. Ai ka bashkëpunuar me dirigjentë të njohur ndërkombëtarë si Vladimir Ashkenazy, Semyon Bychkov dhe Stanislaw Skrowaczewski. Përveç karrierës së tij artistike, Ashkenazy është edhe pedagog aktiv në akademi të njohura në Zvicër dhe Itali, ku ndan përvojën e tij me gjeneratat e reja të pianistëve.
Mundesh me e lexu edhe…
Ndërkohë, Luca Rasca, nxënës i Franco Scala dhe Akademisë së Pianos në Imola, është një tjetër emër i madh i skenës pianistike. Si “Artist i Steinway”, ai është fitues i një sërë çmimesh të rëndësishme kombëtare dhe ndërkombëtare, përfshirë Konkursin Pianistik të Londrës, Busoni në Bolzano, Palma d’Oro në Finale Ligure, Schubert në Dortmund, Scriabin në Grosseto, Chopin në Romë, Città di Treviso, Casagrande në Terni dhe Viotti në Vercelli.
Ky koncert pritet të jetë një përzierje e rrallë mjeshtërie muzikore dhe interpretimi të thellë emocional, duke ofruar një përvojë unike për të gjithë të pranishmit. Koncerti do të mbahet në kuadër të ngjarjeve që shënojnë festivalin tradicional “Chopin Piano Fest”, i cili çdo vit sjell në Kosovë emra të njohur të pianistikës botërore./Katror.info
