198 ndërmarrje mikro, të vogla dhe të mesme kanë nënshkruar marrëveshjet për përfitim nga Ministria e Industrisë, Ndërmarrësisë dhe Tregtisë (MINT), përmes skemave mbështetëse të Agjencisë Kosovare për Mbështetjen e Ndërmarrjeve (KIESA). Përkrahja totale për këto biznese arrin në shumën prej 8.9 milionë euro.
Gjatë ceremonisë së nënshkrimit, kryeministri në detyrë Albin Kurti tha se përfituesit janë ndarë sipas tri skemave të ndryshme të granteve.
“Këto 198 ndërmarrje janë përfituese nga tri skema të granteve nga KIESA. E para është skema për mbështetjen e ndërmarrjeve prodhuese me potencial për eksport, për blerjen e makinerive prodhuese – me 129 ndërmarrje përfituese dhe vlerë prej 7.3 milionë euro. Qëllimi është zgjerimi i kapaciteteve prodhuese dhe përpunuese në sektorët prioritarë industrialë dhe rritja e konkurrueshmërisë me produkte që kanë vlerë për tregun ndërkombëtar,” tha Kurti.
Mundesh me e lexu edhe...
Skema e dytë, sipas tij, ka për qëllim mbështetjen e ndërmarrjeve në sektorin e teknologjisë së informacionit dhe komunikimit, ku 42 kompani do të përfitojnë rreth 1 milion euro. Ndërsa skema e tretë synon certifikimin e produkteve, nga e cila 27 biznese do të mbështeten me 600 mijë euro.
Ministrja në detyrë e Industrisë, Ndërmarrësisë dhe Tregtisë, Rozeta Hajdari, theksoi se MINT do të vazhdojë mbështetjen për bizneset vendore dhe nismat e reja.
“MINT mbetet e përkushtuar në përkrahjen e vazhdueshme të ndërmarrjeve mikro, të vogla dhe të mesme dhe start-up-eve në Kosovë. Së bashku me ju, me mbështetjen e qeverisë dhe partnerëve, synojmë rritjen ekonomike të qëndrueshme dhe forcimin e ekosistemeve të inovacionit,” deklaroi ajo.
Ky program mbështetës konsiderohet një nga iniciativat më të rëndësishme të MINT për zhvillimin e sektorit privat dhe nxitjen e inovacionit në ekonomi./Katror.info
