Instituti Hidrometeorologjik i Kosovës (IHMK) ka paralajmëruar se reshjet e shiut të ditëve të fundit kanë shkaktuar rritje të niveleve të lumenjve, duke krijuar rrezik për vërshime në disa zona të vendit. Sipas IHMK-së, vendbanimet më të rrezikuara janë ato në Hani i Elezit, Kaçanik, Dragash, Pejë, Deçan dhe pellgu i Moravës së Binçës, shkruan Katror.info.
Në një njoftim për media, IHMK ka theksuar se reshjet e shiut, të cilat kanë variuar nga intensiteti i ulët deri në atë mesatar dhe kanë zgjatur për një periudhë të gjatë, kanë shkaktuar ngritje të niveleve të lumenjve, sidomos në lumenjtë malorë. Situata më e rënduar është regjistruar në pellgjet e Lepencit, Moravës së Binçës, Bistricës së Pejës, Bistricës së Prizrenit dhe Bistricës së Deçanit, ku nivelet aktuale të ujit po vazhdojnë të rriten, duke rrezikuar përmbytje.
Reshjet e shiut pritet të vazhdojnë edhe gjatë ditëve në vijim, duke përkeqësuar situatën, dhe mund të shkaktojnë vërshime të shpejta në disa pjesë të vendit. IHMK ka kërkuar vëmendje të shtuar, sidomos në zonat e lartpërmendura, dhe ka theksuar se reshjet mund të jenë me intensitet mesatar deri të lartë.
Mundesh me e lexu edhe…
Gjithashtu, IHMK ka paralajmëruar se ditën e diel do të ketë borë në Kosovë, por reshjet nuk pritet të kenë intensitet të lartë. Besim Aliu nga IHMK ka theksuar se ulja e temperaturave mund të ndikojë negativisht në bimët që janë në fazën e lulëzimit, pasi ato mund të dëmtohen nga ngricat. Temperaturat minimale mund të zbresin deri në minus 3 gradë Celsius./Katror.info
Përgatiti:
