Shumica e shkollave në Angli kanë ndaluar përdorimin e telefonave të mençur, edhe pse nuk ka një ligj qeveritar që e detyron këtë masë. Një anketë e fundit ka treguar se 99.8% e shkollave fillore dhe 90% e atyre të mesme kanë vendosur ndalesa ndaj telefonave, raporton The Guardian, përcjell Katror.
“Ky është një dëshmi gjithëpërfshirëse që tregon se qasja jonë – duke u dhënë drejtorëve të shkollave dorë të lirë për të vendosur – po funksionon,” deklaroi Sekretarja aktuale e Arsimit në Mbretërinë e Bashkuar, Bridget Philipson.
Ndalimi i telefonave, sidomos gjatë orëve mësimore, është parë si një mënyrë efektive për të përmirësuar përqendrimin dhe rezultatet e nxënësve. Kjo nuk vlen për rastet kur telefonat apo tabletët përdoren për qëllime mësimore – të cilat nuk janë përfshirë në të dhënat e anketës.
Mundesh me e lexu edhe…
“Shumë nga kjo lidhet me një betejë për vëmendjen, për fokusin. Nuk ka të bëjë vetëm me përdorimin e telefonit – edhe vetëm prania e tij është shpërqendruese,” tha Tom Rees, drejtor ekzekutiv i rrjetit privat të shkollave Ormiston. “Ka dëshmi që tregojnë se edhe kur telefoni është në çantë apo xhep, truri vazhdon ta kërkojë, të pyesë nëse ka ndonjë njoftim të ri.”
Ormiston ishte ndër rrjetet e para që ndaloi tërësisht përdorimin e telefonave në mjediset shkollore.
Në të njëjtën linjë, Justine Elbourne-Cload nga konsorciumi i shkollave fillore në St Albans – i pari që vendosi ndalimin e plotë të telefonave për moshat nën 14 vjeç – tha se reagimi i prindërve ka qenë “fenomenal”. “Ata janë të përfshirë plotësisht. Prindërit po kërkojnë me ngulm këtë lloj mbështetjeje,” u shpreh ajo.
Ndërkohë, në Shtetet e Bashkuara, janë tashmë 13 shtete që kanë ndërmarrë hapa konkretë për të kufizuar përdorimin e pajisjeve teknologjike në shkolla. Në shtete si Delaware, Pennsylvania dhe Arkansas, qeveritë lokale kanë ofruar fonde për shkollat që duan t’i mbyllin telefonat në kuti të posaçme gjatë mësimit, shkruan GoodNewsNetwork, përcjell Katror.
Florida dhe Kalifornia kanë miratuar ndalesa të drejtpërdrejta, me Kaliforninë që do ta zbatojë plotësisht vendimin deri më 1 korrik 2026. Ndërsa shtete si Ohio, Virginia, Indiana dhe Minnesota i kanë lënë vetë shkollave detyrën për të hartuar politika kufizuese.
Në disa shtete të tjera, si Washington dhe Alabama, janë miratuar vetëm udhëzime jo detyruese.
“Kërkimet janë të qarta: kufizimi i përdorimit të telefonave gjatë orës mësimore përmirëson përqendrimin dhe të nxënit, ndikon pozitivisht në shëndetin mendor dhe fizik dhe ul presionet që krijon rrjetëzimi social,” thuhet në udhëzimin zyrtar të publikuar nga Chris Reykdal, drejtor i shkollave publike në Washington./Katror.info
