Ukraina është gati të nënshkruajë marrëveshjen e shumëpritur për mineralet me Shtetet e Bashkuara, konfirmoi kryeministri ukrainas Denys Shmyhal, ndërsa presidenti amerikan Donald Trump tha se “nëse janë gati, nënshkruajmë pasdite”, shkruan BBC, përcjell Katror.info.
Sipas ministrit të Thesarit, Scott Bessent, të dyja palët bënë disa “ndryshime të minutës së fundit” por “asgjë nuk u hoq nga marrëveshja që u arrit gjatë fundjavës”.
Trump deklaroi se “nuk deshi të bënte një marrëveshje të ndërlikuar sepse Ukraina nuk ka shumë para”, por shtoi: “paratë tona janë të sigurta”.
Mundesh me e lexu edhe…
Kryeministri Shmyhal sqaroi se marrëveshja përfshin vetëm lejet e ardhshme për shfrytëzimin e nëntokës dhe se Ukraina do të ruajë kontrollin mbi burimet natyrore. Marrëveshja parasheh krijimin e një fondi të përbashkët për investime në rindërtim dhe zhvillim për 10 vitet e ardhshme, me kontribute të barabarta nga të dyja palët.
Dokumenti i draftit, i parë nga BBC, nuk përmban garanci të drejtpërdrejta sigurie për Ukrainën, por e përshkruan marrëveshjen si “një demonstrim konkret të mbështetjes amerikane për sigurinë e Ukrainës”. Nga ana tjetër, përfshirja e SHBA-ve në sektorët strategjikë ukrainas shihet si një formë investimi edhe në aspektin e sigurisë.
Marrëveshja gjithashtu nënkupton që ndihma ushtarake amerikane e ardhshme do të konsiderohet si investim në fond – një lëshim i rëndësishëm nga Ukraina, pasi më herët kishte kërkuar që ndihma e kaluar të kompensohej përmes fitimeve nga mineralet.
Ratifikimi nga parlamenti ukrainas mbetet hapi i fundit për formalizimin e marrëveshjes. Ministrja e Ekonomisë së Ukrainës, Yulia Svyrydenko, ndodhet rrugës për në SHBA, me shpresën se marrëveshja do të nënshkruhet brenda 24 orëve./Katror.info
