SHBA dhe Ukraina kanë nënshkruar një marrëveshje historike që u jep amerikanëve qasje në burimet natyrore të Ukrainës — përfshirë mineralet, naftën dhe gazin — ndërkohë që i hap rrugën një fondi investimesh për rindërtimin e vendit pas luftës, shkruan BBC, përcjell Katror.info.
Marrëveshja nuk kërkon kthimin e ndihmës financiare prej 350 miliardë dollarësh që presidenti amerikan, Donald Trump pretendon se i është dhënë Ukrainës. Kryeministri ukrainas Denys Shmyhal konfirmoi se nuk ka asnjë kusht për “shlyerje borxhi”.
Sipas marrëveshjes, burimet mbeten në pronësi të Ukrainës, por SHBA do të ketë akses të përbashkët. Përfshirja e naftës dhe gazit shihet si lëshim nga pala ukrainase.
Mundesh me e lexu edhe…
Teksti i marrëveshjes thekson se nuk do të ketë përfitime për ata që financuan luftën ruse, duke i dhënë ton më të ashpër qëndrimit amerikan ndaj Kremlinit.
Gjithashtu, marrëveshja nuk prish aspiratat e Ukrainës për t’u anëtarësuar në Bashkimin Evropian (BE). Ajo përfshin zotime që nuk do të pengojë partneritetin me BE-në dhe se çdo ndryshim i nevojshëm në të ardhmen do të negociohet në mirëbesim.
Pjesë e marrëveshjes është edhe mundësia për ndihmë të re ushtarake nga SHBA, përfshirë sistemet e mbrojtjes ajrore, megjithëse nuk ka garanci të qarta të sigurisë — një pikë që vazhdon të mbetet e pasigurt për Kievin.
Në 10 vitet e para, Ukraina pretendon se fitimet nga fondi do të riinvestohen plotësisht brenda vendit, por kjo pjesë nuk është konfirmuar ende në dokumentin zyrtar./BBC/Katror.info
Marrëveshja e plotë këtu.
