Festivali i njohur ndërkombëtar i muzikës klasike, Chopin Piano Fest Prishtina, shënon këtë vit përvjetorin e tij të 15-të. Ky edicion jubilar do të zhvillohet më 8 dhe 9 maj 2025, duke ofruar një program të pasur dhe të larmishëm për dashamirësit e muzikës klasike, shkruan Katror.info.
Edicioni i 15-të do të hapet me një koncert të veçantë nga pianistja polake Maria Ludwika Gabryś-Heyke, i cili do të mbahet në Amfiteatrin e Bibliotekës Universitare të Prishtinës dhe do të fillojë nga ora 20:00.
Sipas njoftimit nga organizatorët, ky edicion do të sjellë një program të pasur dhe të shumëllojshëm, që do të përfshijë vepra klasike tradicionale dhe kompozime bashkëkohore.
Mundesh me e lexu edhe…
Gjatë festivalit, do të performojnë mbi 25 artistë nga vende të ndryshme të botës duke përfshirë artistë nga Kosova, Shqipëria, Franca, Austria, Lituania, Rumania, Italia, SHBA-ja si dhe nga Kuba.
Sipas njoftimit nga organizatorët, programi i edicionit të 15-të të “Chopin Piano Fest Prishtina” përfshin gjithsej 15 koncerte, ku një nga momentet kyçe do të jetë bashkëpunimi tradicional me Filharmoninë e Kosovës. Ky koncert do të mbahet nën dirigjimin e Peter Valentovich dhe do të ketë si soliste pianisten e njohur Sofya Gulyak.
Drejtoresha artistike e festivalit, Lejla Haxhiu Pula, ka shprehur mirënjohjen për përkrahësit dhe miqtë e festivalit ndër vite.
Në editorialin e saj ajo thekson se, megjithë sfidat, sidomos mungesën e infrastrukturës koncertale, festivali ka arritur të ruajë cilësinë dhe entuziazmin, ndërsa shpresat janë të mëdha për ndërtimin e një shtëpie të re koncertale në Prishtinë.
”Gjatë gjithë këtyre viteve, pyetja “Të jemi apo të mos jemi” ka shoqëruar jo vetëm festivalin tonë, por edhe shumë ngjarje të tjera kulturore në Prishtinë. Mungesa e infrastrukturës bazë për organizime të tilla ka qenë një ndër arsyet kryesore të pasigurisë dhe dyshimeve tona. Por këtë vit, më të shpresëplotë se kurrë më parë, qyteti duket se është më në fund pranë ndërtimit të një shtëpie koncertale – një hap shumë i rëndësishëm”, shkroi ajo
Edicioni jubilar do të përmbyllet më 9 maj 2025 me një performancë të veçantë nga pianisti britanik Peter Donohoe.
Të gjitha koncertet e festivalit do të mbahen në Amfiteatrin e ri të Bibliotekës Qendrore Universitare të Prishtinës, përveç koncertit me Filharmoninë e Kosovës, i cili do të zhvillohet në Sallën e Kuqe të Pallatit të Rinisë.
Me kalimin e viteve, “Chopin Piano Fest Prishtina” ka fituar një vend të rëndësishëm në skenën ndërkombëtare të muzikës klasike. Duke sjellë artistë të njohur nga e gjithë bota dhe promovuar talente të reja vendore, ky festival ka bërë të mundur që Prishtina të bëhet një qendër e rëndësishme për këtë lloj muzike.
Festivali ka arritur të shënojë këtë përvjetor të rëndësishëm, duke ofruar një program të larmishëm dhe përkushtim të vazhdueshëm ndaj zhvillimit të artit muzikor në Kosovë./Katror.info
Përgatiti:
