Administrata Tatimore e Kosovës ua rikujton të gjithë personave fizikë jo afaristë, personave fizikë afaristë dhe personave juridikë, se për të ardhurat e realizuara nga furnizimet elektronike, kanë detyrim të deklarojnë dhe të paguajnë tatimet në përputhje me legjislacionin tatimor në fuqi.
Sipas ATK-së, aktivitetet e tyre në vazhdimësi, do të përqendrohen pikërisht te personat, të cilët nuk i deklarojnë të ardhurat e realizuara nga furnizimet elektronike dhe nuk paguajnë tatimet për ato të ardhura, shkruan Katror.info.
Tatimpaguesit, që nuk përmbushin këto detyrime ligjore, duke mos deklaruar dhe/apo mos paguar tatimet për të ardhurat e realizuara nga furnizimet elektronike, do të përballen me masat ndëshkuese sipas legjislacionit tatimor.
Mundesh me e lexu edhe…
“ATK-ja ju bënë thirrje që të gjithë personave të përfshirë në aktivitete lidhur me furnizimet elektronike, që të sigurohen se deklaratat e tyre janë të dorëzuara në kohë, janë të sakta dhe të plota, për të shmangur vonesat apo gjobat që mund të aplikohen, apo nëse vlerësohet se duhet të korrigjojnë deklaratat e tyre, një gjë të tillë duhet ta bëjnë sa më parë, në mënyrë që të përmbushen të gjitha detyrimet tatimore në përputhje me legjislacionin tatimor,” thuhet në njoftimin e ATK.
Përmbushja e këtyre detyrimeve tatimore kontribuon direkt në financimin e programeve qeveritare siç janë: ofrimi i shërbimeve publike, arsimim me standarde të larta, mirëqenie shëndetësore dhe sociale, mbrojtje ligjore dhe siguri, si dhe infrastrukturë të përgjithshme për një mirëqenie më të mirë ekonomike dhe shoqërore./Katror.info
