Dorentina Osmani, Ermal Maliqi (Volejboll), Bleona Juniku, Adhurim Alijaj-(Basketboll), Flaka Hoti, Erza Tafilaj (Hendboll) dhe Eda Varaki, Aridon Luta-Federata e Sporteve Universitare, janë studentët më të mirë që kanë përfituar nga 500 euro bursë.
Këto bursa janë ndarë nga katër federata sportive, ajo e Basketbollit, e Hendbollit, Volejbollit dhe e Sporteve Universitare, drejtuesit e të cilave pohuan se ato do të rriten viteve në vazhdim, raporton KosovaPress.
Dekani i Fakultetit të Edukimit Fizik dhe Sporteve, Florian Miftari theksoi se kjo nismë tregon që në Kosovë ka njerëz që e vlerësojnë akademinë dhe sportin
Mundesh me e lexu edhe…
“Dhënia e këtyre bursave është më shumë se një ndihmë financiare, është dëshmi e qartë se vendi ynë ka njerëz të tillë të cilët janë shumë vizionarë dhe e dinë se çfarë do të thotë akademia dhe sporti. Këta po e bëjnë një hap të til;lë i cili do të jetë i vazhdueshëm ndër vite duke u rritur, mirëpo ju jeni ata që ndikoni drejtpërdrejtë në këtë sukses. Sot nuk po shpërndajmë vetëm bursa por po krijojmë ura të reja bashkëpunimi me të gjitha federatat”, ka thënë Miftari.
Kryetari i Federatës së Basketbollit të Kosovës, Arben Fetahu, deklaroi para studentëve të këtij fakulteti se kjo federata do të vazhdojë me mbështetje të tillë edhe viteve të ardhshme.
“Ky është vetëm fillimi i këtij bashkëpunimi dhe i këtyre bursave dhe po iu premtoj që në vitin e ardhshëm dhe në të gjitha vitet vijuese prej Federatës së Basketbollit të Kosovës do të ketë ndihmë ose përkrahje eksponenciale për ata të cilët këta profesorë i konsideron që janë më të mirët. Këtë vit po e fillojmë me diçka që është simbolike por iu premtoj që për vitin e ardhshëm do të shkojë duke u dyfishuar”, ka deklaruar Fetahu.
Të njëjtin premtim e dhe edhe i kryetari i Federatës së Hendbollit, Edin Kolgeci.
“Jemi në fillim, e kemi nisur këtë punë, këtë ndarje të bursave, shpresojmë që vitin e ardhshëm të kemi më shumë bursa por edhe më shumë studentë të cilët do t’i meritojnë këto bursa”, theksoi Kolgeci.
Musa Selimi, kryetar i Federatës së Sporteve Universitare tha se këta studentë e meritojnë një mbështetje të tillë për shkak të punës dhe angazhimit të tyre që po e bëjnë.
“Këto bursa iu takojnë me plotë meritë, përzgjedhja ka qenë e menaxhmentit të fakultetit tonë dhe kolegëve tanë…Këto bursa do të rriten, viteve të tjera do të ketë edhe më shumë bursa, do të ketë shumë bashkëpunim sepse ju vërtetë e meritoni”, theksoi Selimi.
Ndërsa, kryetari i Federatës së Volejbollit, Bahri Gjinovci, bëri të ditur se federata që ai drejton do të jetë e përkushtuar që këto bursa t’i mbështesë edhe më tepër në të ardhmen.
“Federata e Volejbollit të Kosovës do të jetë e përkushtuar që këto bursa t’i mbështesë edhe më tepër në të ardhmen. E përgëzojë dekanin Miftari për këtë nismë brilante dhe studentëve iu urojë suksese në udhëtimin tuaj akademik dhe sportiv”, deklaroi Gjinovci.
Ditë ma parë, Federata e Futbollit të Kosovës gjithashtu ndau katër bursa me nga 500 euro për studentët e këti fakulteti./KosovaPress
