Mbretëria e Bashkuar dhe Shtetet e Bashkuara kanë arritur një marrëveshje të ngushtë për tarifat tregtare, e cila ul ose heq disa nga tarifat për produktet kryesore të eksportit britanik – por sipas raportimit të BBC, nuk bëhet fjalë për një marrëveshje të plotë tregtare, shkruan Katror.info.
Presidenti amerikan Donald Trump e quajti këtë një “marrëveshje të madhe tregtare”, por në të vërtetë bëhet fjalë për një marrëveshje të përkohshme për disa produkte specifike. Autoritetin për të nënshkruar një marrëveshje të plotë e ka Kongresi amerikan, dhe ky proces do të kërkonte muaj negociatash dhe dokumentacioni ligjor.
Ulje e tarifave për makinat – por me kufizime
Tarifat për makinat britanike që hyjnë në SHBA janë ulur në 10% për deri në 100,000 automjete në vit – e njëjtë me numrin e eksporteve të vitit të kaluar. Mbi këtë kufi, aplikohet një tarifë prej 27.5%. Industria britanike e makinave, me një vlerë prej rreth 9 miliardë£ në eksporte drejt SHBA-ve, e ka përshëndetur marrëveshjen, por paralajmëron se kuota mund të kufizojë konkurrueshmërinë.
Mundesh me e lexu edhe…
Ndërkohë, SHBA do të lejojë eksportin pa tarifa të motorëve dhe pjesëve të avionëve nga Rolls Royce. Trump gjithashtu deklaroi se Mbretëria e Bashkuar do të blejë 10 miliardë dollarë në aeroplanë Boeing.
Heqje e tarifave për çelikun dhe aluminin
Një tjetër përfitim i madh është heqja e tarifës 25% për eksportet britanike të çelikut dhe aluminit në SHBA, të vendosura që nga marsi. Edhe pse eksportet e drejtpërdrejta janë relativisht të ulëta (rreth 700 milionë £), produktet që përmbajnë çelik e alumin – si pajisje palestre, mobilie apo makineri – kapin vlerën e 2.2 miliardë £, apo 5% të totalit të eksporteve britanike drejt SHBA-së. Industria e çelikut kishte paralajmëruar se tarifat do të kishin pasoja shkatërruese nëse nuk hiqeshin.
Farmaceutikët – ende pa marrëveshje
Për produktet farmaceutike nuk ka ende një vendim. Qeveria britanike njoftoi se “do të vazhdohet puna për sektorët e mbetur – si farmaceutikët dhe tarifat reciproke”. Eksportet farmaceutike nga MB në SHBA kishin vlerën 6.6 miliardë £ vitin e kaluar, duke qenë sektori i dytë më i madh pas makinave.
Taksat digjitale mbeten
Nuk pati ndryshime në taksën britanike 2% për shërbimet digjitale që prekin kompani amerikane si Meta, Google dhe Apple. Qeveria britanike tha se palët kanë rënë dakord të punojnë për një marrëveshje të re digjitale që do të “zbus burokracinë për eksportuesit britanikë dhe do të hapë tregje të reja”.
Tarifa bujqësore të reja, por pa kompromise në standarde
Presidenti Trump njoftoi se MB ka hequr tarifat për disa produkte bujqësore amerikane, ndërsa fermerët britanikë kanë fituar një kuotë prej 13,000 tonësh për eksport pa tarifa. Megjithatë, qeveria britanike theksoi se nuk do të ketë ulje të standardeve ushqimore, veçanërisht për mishin amerikan të prodhuar me hormone të rritjes, të ndaluara në MB dhe BE./Katror.info
