Në vitin 2025, Mira Murati, një nga mendjet më të shquara të teknologjisë moderne, është futur në listën e miliarderëve globalë, me një pasuri të vlerësuar rreth 1.4 miliardë dollarë – kryesisht falë startup-it të saj të sapothemeluar, Thinking Machines Lab, një kompani që ka marrë mbi 2 miliardë dollarë investime dhe është vlerësuar në 10 miliardë dollarë brenda vitit të parë të operimit, shkruan Finance Monthly, përcjell Kator.info.
E lindur në Vlorë më 1988, Murati u shpërngul në moshën 16-vjeçare për të ndjekur studimet në Kanada me bursë të plotë, për të vazhduar më pas në SHBA ku përfundoi dy diploma: një në art dhe një tjetër në inxhinieri. Karriera e saj nisi me eksperienca në Tesla, ku punoi për Model X, dhe në Leap Motion me teknologji të realitetit të shtuar.
Emri i saj u bë i njohur në botë kur iu bashkua OpenAI në vitin 2018 dhe më pas u bë CTO (Chief Technology Officer), duke drejtuar zhvillimin e projekteve që ndryshuan rrënjësisht mënyrën si e përdorim inteligjencën artificiale – si ChatGPT, DALL·E dhe GPT-4. Në vitin 2023, ajo u bë përkohësisht CEO i OpenAI gjatë një periudhe krizash të brendshme.
Mundesh me e lexu edhe…
Në shtator të 2024-ës, Murati dha dorëheqje nga OpenAI për të nisur rrugëtimin e saj të pavarur: në fillim të vitit 2025 themeloi Thinking Machines Lab – një kompani që synon të ndërtojë sisteme të inteligjencës artificiale të përgjithshme që janë jo vetëm të fuqishme, por edhe etike, bashkëpunuese dhe të ndërtuara për të qenë në shërbim të njeriut.
Kompania është duke zhvilluar një model të vetin të gjuhës natyrore (LLM), rival i teknologjive më të avancuara si GPT-4.5 dhe Claude 3, me më pak “halucinacione” dhe më shumë përshtatshmëri për përdorim në nivel ndërmarrjesh. Mendohet se Murati ka tërhequr një pjesë të talenteve më të mira të fushës nga OpenAI, DeepMind dhe Meta – një dëshmi e fuqisë së saj si lidere vizionare.
Edhe pse Murati ruan një profil të ulët në jetën personale, ndikimi i saj profesional është gjithnjë e më i dukshëm. Ajo nuk është vetëm një ndër figurat më të rëndësishme në fushën e teknologjisë sot, por edhe një frymëzim i rrallë për të rinjtë – sidomos për ata që vijnë nga vende të vogla dhe ëndërrojnë të lënë gjurmë në botë./Katror.info
