Një studim i fundit nga Universiteti i Tokios ka treguar se monitorimi i vazhdueshëm i glukozës në gjak (CGM) mund të identifikojë në mënyrë më të saktë se testet tradicionale rrezikun e zhvillimit të diabetit, raportoi SciTechDaily.
Ndryshimet e niveleve të sheqerit në gjak, të cilat shpesh lidhen vetëm me energjinë apo ndjesinë e lodhjes, mund të jenë një sinjal i hershëm që trupi nuk po e përpunon siç duhet glukozën.
Nëpërmjet një algoritmi të ri të zhvilluar nga studiuesit japonezë, këto luhatje mund të përdoren për të parashikuar rrezikun e diabetit përpara se të shfaqen simptomat apo të diagnostikohet sëmundja.
Mundesh me e lexu edhe...
Testet tradicionale shpesh dështojnë të kapin sinjalet e hershme
Diabeti, shpesh i përshkruar si një “epidemi e heshtur”, është në rritje në mbarë botën dhe paraqet sfida serioze për shëndetin dhe ekonominë. Parandalimi është thelbësor, por testet aktuale, si analiza e gjakut në mëngjes (glukoza esëll), HbA1c apo testi i tolerancës ndaj glukozës, nuk arrijnë të kapin ndryshimet dinamike të niveleve të sheqerit në jetën e përditshme.
“Testet tradicionale të diabetit janë të dobishme, por nuk pasqyrojnë natyrën dinamike të rregullimit të glukozës në kushte reale fiziologjike”, tha profesori Shinya Kuroda nga Universiteti i Tokios, bashkautor i studimit.
Algoritmi i ri zbulon problemet e fshehura me glukozën
Ekipi përdori pajisje CGM, të cilat matin sheqerin në gjak çdo disa minuta, për të analizuar 64 persona pa diagnozë diabeti. Krahas pajisjeve, ata përdorën edhe testin e tolerancës ndaj glukozës dhe metoda të avancuara për të matur ndjeshmërinë ndaj insulinës. Rezultatet u verifikuan me një grup tjetër të dhënash dhe modele matematike.
Një tregues i quajtur AC_Var, që mat luhatjet në nivelet e glukozës, tregoi një lidhje të fortë me indeksin e predispozicionit — një faktor kyç për parashikimin e rrezikut për diabet, kur ky tregues u kombinua me devijimin standard të glukozës, modeli tejkaloi në saktësi testet tradicionale.
“Duke analizuar të dhënat nga CGM me algoritmin tonë, ne identifikuam persona me çrregullime të fshehura të glukozës — edhe kur testet e zakonshme i klasifikonin si ‘normalë’, dhe kjo do të thotë se mund të veprojmë më herët për të parandaluar diabetin”, shtoi Kuroda.
Për të bërë këtë metodë më të qasshme, studiuesit kanë krijuar edhe një aplikacion në internet, ku individët apo profesionistët e shëndetit mund të llogarisin treguesit e glukozës bazuar në të dhënat nga pajisjet CGM.
“Qëllimi ynë është të ofrojmë një mjet praktik dhe të lehtë për t’u përdorur në kontrollin masiv të diabetit. Duke zbuluar herët problemet me rregullimin e glukozës, shpresojmë të parandalojmë ose të vonojmë shfaqjen e sëmundjes dhe komplikacionet afatgjata”, thotë Kuroda./Albanian Post/Katror.info
