Presidentja e Republikës së Kosovës, Vjosa Osmani, është ftuar për një vizitë shtetërore në Konfederatën e Zvicrës më 21 dhe 22 maj 2025, me ftesë të Këshillit Federal të Zvicrës të udhëhequr nga Presidentja e Konfederatës, znj. Karin Keller-Sutter, shkruan Katror.info.
Kjo vizitë do të shënojë vizitën e parë shtetërore të një Presidenti të Kosovës në Zvicër dhe përbën një moment historik në marrëdhëniet mes dy vendeve.
Vizitat shtetërore janë niveli më i lartë i vizitave ndërmjet shteteve dhe ndodhin rrallë, duke reflektuar një respekt të thellë dhe partneritet të ngushtë ndërmjet dy vendeve.
Mundesh me e lexu edhe…
Gjatë kësaj vizite, Presidentja Osmani do të zhvillojë takime zyrtare me Presidenten Keller-Sutter dhe anëtarët e Këshillit Federal të Zvicrës, si dhe do të mbajë një fjalim në Parlamentin zviceran. Të dyja presidentet do të mbajnë një konferencë të përbashkët për media, ku pritet të adresohen temat kyçe të bashkëpunimit ndërmjet dy shteteve.
Në nder të Presidentes Osmani dhe delegacionit kosovar, Presidentja zvicerane do të organizojë një aheng shtetëror, duke dëshmuar miqësinë e qëndrueshme dhe partneritetin afatgjatë midis Kosovës dhe Zvicrës.
Më 22 maj, Osmani dhe Keller-Sutter do të vizitojnë një ndërmarrje prodhuese në pjesën lindore të Zvicrës si dhe një qendër të Universitetit të Saint Gallen, e cila është e fokusuar në zhvillimin e metodave moderne të të nxënit dhe të mësimdhënies – fusha me rëndësi strategjike për të rinjtë në Kosovë dhe Zvicër.
Po ashtu, gjatë qëndrimit në Zvicër, Presidentja Osmani do të zhvillojë një takim të veçantë me përfaqësues të mërgatës shqiptare në Gjenevë, duke vlerësuar rolin e tyre të jashtëzakonshëm në ndërtimin e urave të bashkëpunimit ndërmjet dy vendeve./Katror.info
