Shoqata Down Syndrome Kosova ka njoftuar se është funksionalizuar aplikimi elektronik për njohjen dhe rivlerësimin e statusit të personave me aftësi të kufizuara përmes platformës zyrtare eKosova. Ky hap përfaqëson një avancim të rëndësishëm në lehtësimin e qasjes në shërbime për këtë kategori të qytetarëve.
Sipas njoftimit të shoqatës, kjo çështje ishte adresuar në muajin janar 2025 në një takim me Ministrinë e Financave, Punës dhe Transfereve, dhe tashmë ka marrë formë konkrete.
“Jemi shumë të lumtur që kjo risi është bërë realitet. Ajo do të thjeshtojë ndjeshëm procedurat dhe do të mundësojë një qasje më të shpejtë e më efikase në shërbimet që u takojnë personave me aftësi të kufizuara”, thuhet në deklaratën e Down Syndrome Kosova.
Mundesh me e lexu edhe…
Gjithashtu për këtë shërbim njoftoi edhe Ministria e Financave, Punës dhe Transfereve.
“Pas prezantimit të aplikimit elektronik për personat paraplegjikë dhe tetraplegjikë, tashmë është lansuar aplikimi elektronik për personat me aftësi të kufizuara dhe atyre me dëmtim të shikimit.
Tashmë në platformën eKosova, qytetarët mund të plotësojnë kërkesën për njohjen e statusit për personat me aftësi të kufizuara apo kërkesën për njohjen e statusit të personave me dëmtim të shikimit si asnjëherë më parë, ku formulari i njëjtë plotësohet qoftë për aplikimin për herë të parë apo për procesin e rivlerësimit”, thuhet në njoftim.
Kjo nismë vlerësohet si një hap i rëndësishëm drejt digjitalizimit të shërbimeve sociale dhe fuqizimit të të drejtave të personave me aftësi të kufizuara në Kosovë./Katror.info
