Në kuadër të Javës së Ndërgjegjësimit për Shëndetin Mendor, Ministria e Shëndetësisë ka zhvilluar një tryezë të rrumbullakët me pjesëmarrjen e zyrtarëve institucionalë dhe profesionistëve të fushës, me qëllim të thellimit të diskutimit mbi sfidat dhe politikat për përmirësimin e kujdesit ndaj shëndetit mendor, shkruan Katror.info.
Sekretari i Përgjithshëm në Ministrinë e Shëndetësisë, Naim Bardiqi, theksoi përkushtimin e institucionit për edukimin dhe vetëdijesimin e qytetarëve mbi rëndësinë e shëndetit mendor, duke e cilësuar atë si një çështje kolektive dhe jo vetëm personale.
“Shëndeti mendor duhet menduar si një përgjegjësi e komunitetit. MSH vazhdon që të punojë për përmirësimin e jetës së personave me shëndet mendor. Janë hartuar shtatë udhërrëfyes klinikë, tre udhëzues dhe janë në proces draftimi projektligji për shëndet mendor, plani strategjik 2025-2030 dhe plani i veprimit për programin e shëndetit mendor,” tha Bardiqi.
Mundesh me e lexu edhe...
Në takim foli edhe Faton Kutllovci, drejtor i Klinikës së Psikiatrisë, i cili vuri theksin te lufta kundër stigmës dhe rëndësia e përfshirjes shoqërore në përkrahje të personave me çrregullime mendore.
“Nuk ka gjë më të fuqishme sesa komuniteti dëgjon, mbështet dhe nuk paragjykon. Shëndeti mendor nuk është çështje individuale, por një përgjegjësi për të gjithë. Jemi duke punuar në profilizimin e Klinikës së Psikiatrisë, ku tashmë është themeluar edhe reparti për fëmijë dhe adoleshentë,” deklaroi ai./Katror.info
