Kompania Termokos ka mbajtur të premten një prezantim publik informues për projektin ambicioz “Solar 4Kosovo II”, i cili synon dekarbonizimin dhe zgjerimin e sistemit të ngrohjes qendrore në kryeqytet përmes burimeve të ripërtëritshme të energjisë, shkruan Katror.info.
Në fjalën e tij, kryetari i Prishtinës, Përparim Rama, theksoi rëndësinë strategjike të këtij projekti, duke theksuar se do të kontribuojë dukshëm në tranzicionin energjetik të vendit dhe në përmirësimin e cilësisë së ajrit në kryeqytet.
“Projekti konsiston në ndërtimin e një centrali diellor me kapacitet prej 50 MGV për të siguruar kapacitet shtesë të energjisë ngrohëse dhe zgjerimin e rrjetit të ngrohjes qendrore në Prishtinë. Në fazën e parë planifikohet një zgjerim prej 50 MGV, ndërsa fazat e mëvonshme parashohin edhe 20 MGV shtesë, duke arritur në një kapacitet total prej 70 MGV”, deklaroi kryetari Rama.
Mundesh me e lexu edhe…
Ai bëri të ditur se projekti financohet nga burime të ndryshme ndërkombëtare dhe vendore, me një kosto totale prej rreth 80.5 milionë euro. Kontributi përfshin grantin prej 31.6 milionë euro nga KfW, 22.5 milionë euro nga WBF, përfshirë asistencë teknike dhe komunikim, si dhe një financim shtesë prej 22 milionë euro nga Banka Evropiane për Rindërtim dhe Zhvillim (BERZH).
Drejtori ekzekutiv i Termokosit, Fisnik Osmani, theksoi se ky projekt do të mundësojë shtrirjen e rrjetit të ngrohjes në lagje të reja të Prishtinës, duke përfshirë pjesët që aktualisht nuk janë të lidhura me sistemin qendror të ngrohjes.
“Zgjerimi i rrjetit në tërë Prishtinën është pjesë e objektivave tona katërvjeçare. Së shpejti do të dalim me një analizë të ndarë në 11 zona të reja të kryeqytetit”, u shpreh Osmani.
Nga ana tjetër, menaxheri i projektit, Felix Eckert, prezantoi detaje teknike, duke theksuar ndarjen në dy komponentë kryesorë: ndërtimin e centralit diellor dhe zgjerimin e rrjetit të shpërndarjes së ngrohjes.
“Prodhimi vjetor i nxehtësisë nga dielli pritet të arrijë rreth 44 GWh, që do të mundësojë lidhjen me rrjetin e rreth 8,500 amvisërive ose 38,000 konsumatorëve. Centralet do të mbulojnë një sipërfaqe prej 63,000 m² dhe përfshijnë një depo nën tokë me kapacitet prej 380,000 metra kub për ruajtjen e nxehtësisë gjatë verës”, shpjegoi Eckert.
Ky projekt pritet të luajë një rol kyç në përmbushjen e objektivave klimatike të Kosovës dhe është një shembull i mirë i bashkëpunimit ndërmjet institucioneve vendore dhe partnerëve ndërkombëtarë në fushën e energjisë së qëndrueshme./Katror.info
