Presidenti i Këshillit Evropian, Antonio Costa, gjatë fjalës së tij në Samitin e Komunitetit Politik Evropian që po mbahet në Tiranë, u bëri thirrje liderëve të kontinentit të tregojnë unitet dhe të investojnë më shumë në mbrojtje për të garantuar paqen në Evropë dhe më gjerë, shkruan Katror.info.
Costa theksoi se pa mbrojtje, paqja mbetet një iluzion, duke shtuar se situata aktuale ndërkombëtare kërkon një reagim të përbashkët dhe të vendosur nga vendet evropiane.
“Titulli i takimit të sotëm është shumë domethënës: një Evropë e re në një botë të re. Kjo është çështja kryesore – çfarë është Evropa dhe cili është roli i saj në këtë rend të ri botëror. Pas Luftës së Dytë Botërore krijuam një sistem të ri ndërkombëtar, por agresioni rus solli sërish luftën në kontinentin tonë,” u shpreh Costa.
Mundesh me e lexu edhe...
Ai gjithashtu i kushtoi vëmendje edhe situatës humanitare në Gaza, duke e cilësuar atë si një tragjedi dhe duke dënuar dhunimin e të drejtës ndërkombëtare.
“Njerëzit po sulmohen me forcë, ndërsa ndërvarësia mes shteteve është shndërruar në një instrument presioni dhe pushteti. Evropa duhet të japë një përgjigje të përbashkët,” theksoi ai.
Costa shtoi se për të arritur një paqe të qëndrueshme, Evropa duhet të investojë më shumë në mbrojtje dhe të marrë një rol aktiv edhe në zgjidhjen e krizave ndërkombëtare, si ajo në Lindjen e Mesme.
“Siguria juaj është edhe siguria jonë. Pa një përfshirje të drejtpërdrejtë dhe të bashkërenduar, do të minohet jo vetëm siguria e kontinentit tonë por edhe autoriteti i vetë Evropës,” përfundoi ai.
Samiti i Komunitetit Politik Evropian po zhvillohet në Tiranë me pjesëmarrjen e liderëve të vendeve të kontinentit, në një kohë sfidash të mëdha për sigurinë, stabilitetin dhe të ardhmen e Evropës./Katror.info
