Komuna e Podujevës ka nisur zyrtarisht procedurat për ndërtimin e Kuzhinës Qendrore, një projekt madhor me vlerë prej 700 mijë eurosh, i cili synon përmirësimin e mirëqenies së fëmijëve dhe avancimin e sistemit arsimor në këtë komunë, shkruan Katror.info.
Kuzhina Qendrore do të ketë kapacitetin për të përgatitur dhe shpërndarë ushqim të ngrohtë për të gjithë fëmijët në çerdhe dhe për nxënësit e shkollave fillore, si dhe për personelin arsimor në institucionet përkatëse. Ky projekt shihet si një element kyç në realizimin e planit për organizimin e mësimit gjithëditor në shkollat e Podujevës.
“Ky projekt është një hap i madh drejt përmirësimit të mirëqenies së fëmijëve dhe një parakusht i rëndësishëm për fillimin e organizimit të mësimit gjithëditor në shkollat e Podujevës. Me këtë projekt, së bashku me investimet që kemi bërë e po vazhdojmë të bëjmë në infrastrukturën arsimore, po krijojmë kushte më të mira për zhvillimin, edukimin dhe kujdesin ndaj brezave të rinj.” thuhet në njoftimin e kryetarit të komunës, Shpejtim Bulliqit.
Mundesh me e lexu edhe…
Autoritetet lokale janë të përkushtuara që projekti të realizohet me standardet më të larta dhe në një afat të arsyeshëm kohor, duke premtuar një ndryshim thelbësor në jetën e përditshme të mijëra fëmijëve dhe mësimdhënësve në Podujevë./Katror.info
