Shkolla fillore “Emin Duraku” në Prishtinë ka përmbyllur me sukses vitin e parë në kuadër të reformës arsimore, duke funksionuar si shkollë e mesme e ulët sipas sistemit 6-9 dhe duke ofruar mësim tërëditor.
Drejtori i shkollës, Visar Osmani, ka vlerësuar se ky vit shkollor ka qenë sfidues, por edhe i pasur me risi dhe arritje të rëndësishme për shkollën.
“Pas 78 vjetësh, për herë të parë shkolla jonë kaloi në sistemin 6-9. I kemi ndërruar nxënësit me shkollën ‘Qamil Batalli’. Ka qenë një vit risish për ne e për mësimdhënësit, vit kombinimesh të reja të klasave dhe stafit, duke ndërtuar themel për të ardhmen,” tha Osmani. Ai shtoi se gjatë këtij viti janë shënuar edhe suksese në garat komunale, si dhe përmirësime në disa lëndë të caktuara.
Mundesh me e lexu edhe…
Drejtori Osmani e pranon se sfidat nuk kanë munguar, por shpreh bindjen se baza e ndërtuar këtë vit do të shërbejë për një vit të dytë edhe më të suksesshëm. “Kuptohet që fillimet kanë qenë të vështira, por me kalimin e kohës çdo gjë ka bërë vendin e vet. Si drejtor, kam dëshirë që shkolla që e drejtoj të veçohet – dhe tashmë është e veçuar në Komunën e Prishtinës. Viti i dytë do të jetë më i lehtë, sepse tashmë kemi vendosur një themel të qëndrueshëm për këtë reformë.”
Reforma arsimore në Prishtinë, përmes kalimit në sistemin 6-9 dhe implementimit të mësimit tërëditor, ka për qëllim përmirësimin e cilësisë së arsimit dhe përshtatjen me standardet bashkëkohore evropiane. Shkolla “Emin Duraku” mbetet një ndër shembujt e parë të këtij transformimi në kryeqytet./EO/Katror.info
