Posta e Kosovës, në bashkëpunim me Ministrinë e Mjedisit, Planifikimit Hapësinor dhe Infrastrukturës, si dhe me Institutin e Kosovës për Mbrojtjen e Natyrës, ka lansuar sot emisionin më të ri të pullave postare, i cili i kushtohet katër prej monumenteve natyrore më të veçanta të vendit: Shpellës së Kusarit, Shpellës “Gryka e Madhe”, Shpellës së Hoxhës dhe Shpellës së Demës, shkruan Katror.info.
Ky emision i veçantë ofron një udhëtim vizual të pasur nëpër thesaret nëntokësore të Kosovës, duke përçuar tek publiku vlerat e rralla gjeologjike, arkeologjike, biologjike dhe historike të këtyre lokaliteteve unike.
Shpella e Kusarit, e ndodhur pranë fshatit Kusar në Gjakovë, është pjesë e peizazhit karstik të Malit Pashtrik dhe ruan gjurmë të banimit të hershëm në strukturat e saj gëlqerore mijëvjeçare.
Mundesh me e lexu edhe…
Ndërsa Shpella “Gryka e Madhe”, e pozicionuar në Grykën e Rugovës, ofron një spektakël natyror me stalaktite, stalagmite, lumenj e liqene nëntokësore – një prej shpellave më të mëdha dhe më të rëndësishme në Kosovë për nga vlera turistike dhe speleologjike.
Shpella e Hoxhës, mbi fshatin Vrellë të Istogut, ka një rëndësi të veçantë arkeologjike, pasi përmban dëshmi të banimit që nga parahistoria, përfshirë fragmente qeramike dhe një liqen të brendshëm të formuar nga pikimi i stalaktiteve.
Po ashtu, Shpella e Demës, e vendosur pranë Patrikanës së Pejës në hyrje të Grykës së Rugovës, është një pikë takimi ndërmjet natyrës dhe historisë, ku ruhen gjurmë të qëndrueshmërisë njerëzore ndër shekuj.
Përmes këtij emisioni, Posta e Kosovës synon të rrisë vetëdijen për rëndësinë e mbrojtjes së trashëgimisë natyrore dhe kulturore. Pullat postare, përtej funksionit të tyre tradicional, shërbejnë si mjet edukimi dhe promovimi të vlerave kombëtare në arenën ndërkombëtare./Katror.info
