Në një deklaratë që ka bërë jehonë të madhe në botën e futbollit, Lionel Messi ka ndarë mendimet e tij për rivalin e përjetshëm, Cristiano Ronaldon, duke e cilësuar atë si një sportist të jashtëzakonshëm dhe një njeri që meriton admirimin e tij, shkruan Katror.info.
“Kam respekt dhe e admiroj Cristiano Ronaldon. Për karrierën që ka pasur dhe vazhdon të ketë. Ai ende po luan në nivele të larta,” u shpreh ylli argjentinas, i cili aktualisht luan për Inter Miami në Shtetet e Bashkuara.
Messi theksoi se rivaliteti mes tyre ka qenë gjithmonë profesional dhe i kufizuar në fushën e lojës: “Gara mes meje dhe atij ishte në fushë. Të dy kemi dashur gjithmonë të bëjmë më të mirën për skuadrën. Gjithçka qëndron në fushë”.
Mundesh me e lexu edhe…
Duke folur për marrëdhënien e tyre jashtë fushës, Messi shtoi: “Jashtë fushës, ne jemi dy djem normal. Ne nuk jemi shokë sepse nuk shpenzojmë kohë së bashku, por ne gjithmonë e kemi respektuar njëri-tjetrin”.
Deklarata e Messit vjen si një dëshmi e pjekurisë dhe respektit mes dy prej futbollistëve më të mëdhenj në histori, të cilët për më shumë se një dekadë kanë dominuar skenën botërore të futbollit./Katror.info
