Prishtina vazhdon të festojë muajin e Çlirimit me ngjarje të rëndësishme kulturore, ndër të cilat kulmon inaugurimi i Orkestrës Prishtina – OPR, një projekt i ri muzikor që pritet të japë impuls të ri në skenën artistike të vendit.
Sonte, me fillim nga ora 19:00 në Sallën e Kuqe të Pallatit të Rinisë, publiku do të ketë mundësinë të ndjekë koncertin inaugurues të kësaj orkestre të re, e cila po prezantohet si një hap i rëndësishëm në përforcimin e infrastrukturës muzikore dhe ngritjen e standardeve artistike në Kryeqytet.
Drejtoresha për Kulturë në Komunën e Prishtinës, Sibel Halimi, përmes një postimi ka ftuar qytetarët të marrin pjesë në këtë ngjarje, duke theksuar rëndësinë që ka krijimi i një ansambli të tillë për jetën kulturore të qytetit.
Mundesh me e lexu edhe…
“Inaugurimi i Orkestrës Prishtina vjen si rezultat i përkushtimit tonë për ta bërë kulturën më të qasshme dhe për të sjellë risi në skenën artistike të kryeqytetit,” ka theksuar Halimi.
Ngjarja organizohet nga Drejtoria e Kulturës e Komunës së Prishtinës, në kuadër të programit të aktiviteteve për muajin e Çlirimit, dhe mbështetet nga kryetari Përparim Rama.
Orkestra Prishtina është një ansambël i zgjeruar kamertal, i themeluar me iniciativë të Komunës së Prishtinës, si një përgjigje konkrete ndaj nevojave të reja kulturore që ka sjellë zhvillimi i muzikës artistike në qytet gjatë viteve të fundit. Breza të rinj profesionistësh të muzikës po kontribuojnë me një frymë të re artistike, duke ndërtuar ura të reja mes publikut dhe skenës, si dhe duke sfiduar kontradiktat shoqërore të kohës.
Themelimi i OPR-së është bërë i mundur falë bashkëpunimit me Organizatën për Bashkëpunime Artistike EHO, e cila ka bashkuar emra të dalluar të skenës muzikore: Gresa Broqi (drejtoreshë e EHO), Genc Salihu (drejtor i OPR) dhe Visar Kuçi (koncertmjeshtër i OPR). Së bashku, ata sjellin një vizion kuratorial që synon të nderojë dhe të avancojë trashëgiminë artistike të Prishtinës, duke ofruar një hapësirë të re për eksperiment artistik dhe bashkëpunim kreativ./Katror.info
